Бу өрөспүүбүлүкэни аймаабыт үс киһини өлөрүү дьыалата 2016 сыл балаҕан ыйын 25 күнэ үүнэр түүнүгэр Дьааҥы улууһун Сайдыы сэлиэнньэтигэр буолбута. Өлөрүөхсүттэргэ Үрдүкү суут бириигэбэрэ тахсыбытын туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Суут быһаарбытынан, 2016 сыл балаҕан ыйын 25 күнэ үүнэр түүнүгэр 17 уонна 18 саастаах бэдиктэр итирэн баран, билэр киһилэрин дьиэтигэр тиийбиттэр. Уонна арыгылыы олорон, хаһаайыны кытта урут кыыһырса сылдьыбыттарын өйдөөн кэлэн, бу киһини муомахтаан өлөрбүттэр.
Итиэннэ өлүөхсүт эпилепсия ыарыылааҕын билэр буолан, бэйэтэ эмискэ ыалдьан өлбүтүн курдук оҥорон, дьиэҕэ туора дьон сылдьыбатаҕын курдук суолларын-иистэрин соппуттар.
Ити кэнниттэн өлөрүөхсүттэр СКС уонна «Вепрь» карабиннарынан сэбилэнэн, атын киһи тэлгэһэтиттэн «Toyota Hiace» массыынаны күрэтэн, куотаары оҥостубуттар. Онуоха массыына күлүүһүн булбакка, дьиэҕэ киирээри гыммыттар.
Ол кэмҥэ дьиэттэн 49-саастаах хаһаайын, дьон атаҕын тыаһын истэн, таһырдьа тахсан кэлбит. Бөрөстүүпүнньүктэртэн биирдэстэрэ бу киһини хаста да ыппыт. Хаһаайын охтон баран, күүлэҕэ баар ойоҕор көмө ыҥырарыгар хаһыытаабыт уонна сонно тыына быстаахтаабыт… Бу дьиккэрдэр ойоҕо көрөн турдаҕына, эрин өлөрбүттэр.
Салгыы дьиэҕэ дьон, ол иһигэр, оҕолор баалларын билэ-билэ, дьиэни харса суох ытыалаабыттар. Онтон күүлэҕэ сүүрэн тахсыбыт 23 саастаах уолу илиигэ, атахха, искэ биэстэ ытан, эмиэ тута тыынын быспыттар.
Дьону бу курдук «сиэн» баран, өссө 12 калибрдаах сааны уоран барбыттар.
Куота-саһа сылдьар өлөрүөхсүттэри онно тиийбит суһал-силиэстийэлиир бөлөх сотрудниктарын кытта олохтоохтор эмиэ көрдөспүттэр.
Уонна балаҕан ыйын 26 күнүгэр Сайдыыттан 6 км сиргэ, Дьааҥы өрүс кытылын ойууругар 18 саастаах уорбаланааччыны булбуттар. Бу сордоох сыҥааҕын уонна муннун саанан ытынан, бэйэтигэр тиийинэ сатаабыт. Бу урдуһу балыыһаҕа киллэрэн, эпэрээссийэ оҥоһуллубут.
Оттон иккиһин ити күн киэһэтигэр, 16.00 чаас саҕана, быраҕыллыбыт дьиэҕэ саспытын булбуттара. Кинини тутууга атахха ытан бааһырдыбыттара. Ойууртан уорбут сааларын уонна ботуруоннары булбуттара.
Холуобунай дьыала тэриллэн, силиэстийэ бара турар кэмигэр өссө хас да чахчы биллибитэ: бу урдустар ити алдьархайы оҥоруохтарын иннинэ бэкээринэттэн бородуукта уорбуттар.
СӨ Үрдүкү суутун уурааҕынан, буруйу оҥороругар 17 саастаах уол 10 сылга уопсай эрэсиимнээх, онтон онно 18 саастааҕа 25 сылга кытаанах эрэсиимнээх холуонньаҕа көҥүллэрэ быһылынна.
Биһиги корр., «Саха сирэ» хаһыат, edersaas.ru
Хаартыскалар: РФ Силиэстийэлиир кэмитиэтин Саха сиринээҕи управлениета.