СӨ Үрдүкү суутугар үс киһини өлөрүөхсүккэ бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.
Үрдүкү суут быһаарбытынан, 2017 сыл от ыйын 3 күнүгэр Алдан оройуонугар бу киһи аҕатын уонна икки билэр дьонун кытта бултуу тахсыбыттар.
Сарсыарда арыгылыы олорон, кыыһырсан-бурҕачыһан турбуттар. Онуоха бу Д. диэн киһи аҕатын «САЙГА-МК» харабыынын ылан, бастаан аҕатын, онтон ол икки киһини ытыалаан, миэстэлэригэр өлөртөөбүт.
Суут кинини үс киһини өлөрүүгэ уонна сэби-сэбиргэли сокуоннайа суохтук ылыыга, илдьэ сылдьыыга буруйдааҕынан билинэн, 20 сылга кытаанах эрэсиимнэх холуонньаҕа көҥүлүн быһарга уурбут.
Онно эбии 2 сылга көҥүлэ хааччахтанар, 30 тыһ. солк. сууммалаах ыстараап төлүүр.
Бириигэбэр сокуоннай күүһүгэр киирэ илик.
Бултуу сылдьан, арыгыны иһии туох да үчүгэйгэ тиэрдибэтин бу да дьыала туоһулуур.
Биһиги корр., «Саха сирэ» хаһыат, edersaas.ru
Хаартыска: интэриниэттэн