Үс киһини “коронавируска” күтүрүүллэр

Бөлөххө киир:

Бүгүн, олунньу 3 күнүгэр, Дьокуускай куорат 4-с нүөмэрдээх поликлиникатыгар “коронавирустаах киһини булан, сабыылаах наһыылкаҕа уган илдьибиттэр” диэн сурах, буоларын курдук, “батсаабынан” бэрт түргэнник тарҕанна.

edersaas.ru

Сорох дьон, ити сураҕы көнөтүнэн өйдөөн, “коронавируһу булбуттар” диэн өйдөөбүт. Аптекаларга мааска суох дииллэр. Чахчы, ити поликлиникаҕа сылдьыбыт дьон кэпсээннэринэн, эбиэт кэннэ быраастар эмискэ ааннарын саптан баран, мааскалары түҥэтэн барбыттар. Куорат 3-с нүөмэрдээх балыыһатын 2-с терапевтическэй отделениета сабыллыбыт.

Бу чааска доруобуйа харыстабылын министиэристибэтэ иһитиннэрбитинэн, Кытайтан уонна Таилантан кэлбит үс киһи балыыһаҕа киирбит. Кинилэр кыраадыспыт үрдүк, сөтөллөбүт диэн үҥсэргээбиттэр. Роспотребнадзор уонна РФ доруобуйа харыстабылыгар министиэристибэтэ олохтообут быраабылатын быһыытынан, суһал миэрэ ылыллан, кинилэри Өрөспүүбүлүкэтээҕи клиническэй балыыһаҕа укпуттар. Маннык сибикилээх дьон анаалыстарын Новосибирскайдааҕы лабораторияҕа ыыталлар, сабыылаах балаатаҕа сытыараллар.

Доруобуйа харыстабылын министиэристибэтэ “Саха сиригэр коронавируһунан ыалдьыбыт түбэлтэ суох” диэн тоһоҕолоон бэлиэтиир. Бу түгэҥҥэ диэри 7 киһини «коронавируска» күтүрээбиттэр эрээри, биир да түбэлтэ бигэргэммэтэх. Ол эбэтэр, бу дьон көннөрү тумуулаабыттар эбит. Онон бүгүн ыалдьыбыт үс киһи эмиэ көннөрү тумуулаабыт, эбэтэр кирииптээбит буолуохтарын сөп.

Ангелина Васильева, “Саха сирэ” хаһыат, edersaas.ru

Хаартыска — Интэриниэттэн.

+1
0
+1
0
+1
0
+1
0
+1
0
+1
0
+1
0