Үс игирэни мэдиссиинэ кииниттэн таһаардылар

Бөлөххө киир:

Ааспыт сыл ахсынньытыгар эдэр ыалга — Варвара уонна Клим Васильевтарга үс игирэ төрөөбүтэ. Кырачааннары Айхал, Арылхан уонна Анеля диэн ааттаабыттара. Кинилэр болдьохторун иннинэ төрөөбүттэрэ, онон икки ый устата миэдиктэр көрүүлэригэр сыппыттара.

Кулун тутар 4 күнүгэр Национальнай мэдиссиинэ кииниттэн Ийэ сылыгар бастакы үс игирэни үөрүүлээх быһыыга-майгыга таһаардылар. Киин кылаабынай бырааһа Станислав Жирков эппитинэн, кырачааннар төрүүллэригэр 1,2-1,4 киилэ ыйааһыннаах эбиттэр. Билигин кинилэр эт тутан, 3-3,4 киилэ ыйааһыннаннылар.

Васильевтар соҕотохто биэс оҕолоно түспүттэр. Игирэлэр убайдара Айсен уонна Айтал диэннэр, кинилэр эмиэ игирэлэр. Ол эбэтэр, ийэлэрэ иккитэ эрэ төрөөбүт. Дьиэ кэргэҥҥэ бэһис оҕонон соҕотох кэрэчээн кыысчаан Анеля Саҥа дьыллааҕы бэлэх буолан кэлбит.

Төрөппүттэрэ миэдиктэргэ улаханнык махтаннылар.

Бу икки ый устата миэдиктэр сылаас сыһыаннарын, уҕараабат болҕомтолорун, бүөбэйдиир көрүүлэрин-истиилэрин биллибит. Бу биһиэхэ үрдүк технологиялаах тэриллээх, үрдүк квалификациялаах быраастардаах аныгы мэдиссиинэ киинэ баара наһаа үчүгэй. Онон Национальнай мэдиссиинэ киинин кэлэктиибигэр улахан махталбытын тиэрдэбит, — диэн Варвара, Клим Васильевтар долгуйа билиннилэр.

«Демография» национальнай бырайыак үлэтин чэрчитинэн, Васильевтар судаарыстыбаттан көмө ылар бырааптаахтар. Саха сиригэр үһүс уонна онтон кэлэр оҕолорго 3 саастарыгар диэри төлөбүр ый аайы төлөнөр. Суумата – 19,5 тыһыынча солкуобай. Ону тэҥэ, Өрөспүүбүлүкэтээҕи Ийэ хапытаала (144 тыһыынча солкуобай) бэриллэр. Өрөспүүбүлүкэтээҕи сокуон чэрчитинэн, үс игирэни төрөппүттэргэ кыбартыыра бэриллиэхтээх.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0