Ийэ сылыгар номнуо иккис төгүлүн үс игирэни үөрүүлээх быһыыга-майгыга төрүүр дьиэттэн таһаардылар. Оттон 2021 сыллаахха биэс дьиэ кэргэҥҥэ үс игирэ төрөөбүтэ.
Национальнай мэдиссиинэ кииниттэн Чокуурдаахха олорор Виктория уонна Александр Авдышевтары оҕолорун кытары таһаардылар. Кинилэр ОДьКХ судаарыстыбаннай-унитарнай тэрилтэ Аллайыахатааҕы салаатыгар үлэлииллэр. Александр Сергеевич – саахал-диспетчерскэй сулууспа начаалынньыга, Виктория Васильевна – уматык, энэргиэтикэ исписэлииһэ.
Эдэр ийэ бу бастакы төрөөһүнэ. Кыргыттарын Амели, Вилена уонна Милана диэн ааттаабыттар. Саҥа Дьыл буолуон аҕай иннинэ, ахсынньы 29 күнүгэр төрөөбүттэр. Билигин балыыһаҕа быраастар кыһамньылаах көрүүлэригэр-истиилэригэр сытан, толору эттэнэн-сииннэнэн, улаатан, дьиэлэригэр тахсар кэмнэрэ тосхойдо.
Үс игирэни, дьоллоох төрөппүттэри үлэ, социальнай сайдыы миниистирэ Елена Волкова эҕэрдэлээтэ.
— Үс игирэ төрөөһүнэ — бэрт сэдэх көстүү. Онон барыбытыгар олус долгутуулаах уонна үөрүүлээх түгэн. Үс игирэни төрөппүт уонна олорор усулуобуйаларын тупсарарга наадыйар дьиэ кэргэттэргэ судаарыстыбаттан көмө көрүллэр. Онон Авдышевтар эмиэ бу көмөнөн туһаныахтара, олорор усулуобуйаларын тупсарыахтара, — диэн миниистир эттэ.
Билиҥҥитэ элбэх оҕолоох дьиэ кэргэттэргэ ананар босуобуйалары, төлөбүрдэри Авдышевтар номнуо ыла олороллор. Ону тэҥэ, дойдуларыгар тиийэн баран, докумуоннарын толорон, көмөнү ситэри ылыахтара.
Ангелина Васильева, “Саха сирэ” хаһыат, edersaas.ru