Саҥа дьыл буолара аҕыйах хонук хаалбытын кэннэ, Национальнай мэдиссиинэ киинин Перинатальнай кииниттэн 3 игирэни төрөппүт ийэни үөрүүлээх-быһыыга-майгыга таһаардылар. Кыргыттары София, Таисия, Раиса диэн ааттаабыттар.
Кинилэр төрөппүттэрэ Мария уонна Кирилл Владимирович Помогаевтар Аллараа Халыма улууһун Андрюшкино сэлиэнньэтигэр олороллор, 8 уонна 4 саастаах кыргыттардаахтар. Мария Михайловна оҕо саадыгар иитээччи көмөлөһөөччүтүнэн, аҕалара ОДьКХ үлэһитинэн үлэлииллэр. Онон кырачаан кыргыттар Саҥа дьыллааҕы бэлэх буолан кэлэн, бу ыал соҕотохто биэс оҕолоно түспүттэр.
Элбэх оҕолоох дьиэ кэргэни Үлэ, социальнай сайдыы миниистирэ Елена Волкова, доруобуйа харыстабылын миниистирэ Лена Афанасьева, Аллараа Халыма улууһун баһылыга Валерий Сентяков, уо.д.а. кэлэн эҕэрдэлээтилэр, үгүс үтүө тыллар эттилэр, бэлэх биэрдилэр.
“Демография” национальнай бырайыак чэрчитинэн, үһүс уонна онтон кэлэр оҕоҕо дьиэ кэргэн ипотекатын төлүүрүгэр 450 тыһыынча солкуобай бэриллэр. Ону тэҥэ, “Дьиэ кэргэн” эрэгийиэннээҕи Ийэ хапытаала уонна оҕо 3 сааһын туолуор диэри ый аайы 18 559 солкуобайдаах босуобуйа төлөнөр. СӨ бырабыыталыстыбатын 2010 сыл бэс ыйын 3 күнүнээҕи 204 №-дээх уурааҕынан, үс игирэни төрөппүт ыалга дьиэ ылалларыгар социальнай төлөбүр оҥоһуллар.
Ангелина Васильева, “Саха сирэ” хаһыат, edersaas.ru