Сүһүөхтээх бэйэбит сүгүрүйэбит

Ааптар: 
Бөлөххө киир:

«Сүһүөхтээх бэйэбит сүгүрүйэбит» диэн суругун Сүлдьүкээртэн нэһилиэк баһылыга Иван Оюров саҕалыыр.

—Төрүт олохтоох эбэҥкилэр түөлбэлээн олорор нэһилиэктэриттэн, Сүлдьүкээртэн (Мииринэй),  чугас уот туран, олохтоохторго куттал суоһуу сырытта, — диэн саҕалыыр. — Бэс ыйын 22 күнүттэн 26 күнүгэр диэри бэйэбит күүспүтүнэн ойуурга турбут уоту умуруора сатаабыппыт. Олохтоохтор барахсаттар кырдьаҕастыын-эдэрдиин эр дьон бары турунан, баһаары умуруорууга туох баар сыраларын уурдулар. Далбар хотуттарбыт, кэрэ кыргыттарбыт ким да туора турбакка, уоту утары туруулаһа сылдьар дьонноругар ас-астаан тиһиктээхтик хааччыйдылар. Нэһилиэнньэ олус түмсүүлээҕин көрдөрдө.

Дьон бэйэлэрэ туох тиэхиньикэлээхтэринэн көмөлөстүлэр. Бэйэбит илдьэ сылдьан умуруорарга туттуллар 26 тэриллээх этибит. Кэлин мииринэйдэр оннук 25 тэрили эбии ыытан санаабытын бөҕөргөппүттэрэ.

АЛРОСА вездеходтары, биһиги алдьаммыт вездеходтарбытыгар саппаас чаастары ыытан улаханнык абыраата. Ыаллыы Светлайтан, Мииринэйтэн бу күүдэпчилэнэр уоту умуруорса эбии дьон кэлэн, кыһалҕалаах күннэрбитигэр өйөбүл, бигэ тирэх буоллулар.

Бэс ыйын 28 күнүгэр 22 км усталаах ханааба хаһан, баһаары сөҕүрүтэр үлэни ыытан, солбуйса сылдьан түүннэри-күннэри харса суох үлэлээбиппит.

От ыйын 13 күнүгэр күүстээх тыаллар түһэннэр, уот мастар үрдүлэринэн уһууран, бөһүөлэккэ чугаһаан, улахан кутталы үөскэппитэ. Инньэ гынан ыксаллаах быһыы-майгы эрэсиимин (ЧС) биллэрбиппит.


Бу ыксаллаах кэмҥэ СӨ Ил Дархана Айсен Николаев кэлэн, көмөҕө уу ыһар самолеттары ыыттаран, Арассыыйаттан МЧС-тары — 43 киһи кэлэрин ситиһэн, олохтоохтору кытта көрсөн, кэпсэтэн, барыбыт сүрэхпитигэр уоскулаҥы олохтоон, барыбытын улаханнык үөртэ.

Түгэнинэн туһанан, Ил Дархаммытыгар Сүлдьүкээр бары олохтоохторо махтанан тураммыт сүһүөхтээх бэйэбит сүгүрүйэбит, хоолдьуктаах бэйэбит хоҥкуйабыт! Бар дьоҥҥор мэлдьи маннык суон дурда, халыҥ хахха, тулхадыйбат тулааһын буола сырыт!

Итиэннэ Бурятияттан кэлбит Иван Халбаев салайааччылаах десантниктар наһаа көмөлөспүттэрин бэлиэтээн туран, кинилэргэ барҕа махталбытын тиэрдэбит. Барҕа махталбытын тиэрдэбит кыһалҕалаах  кэммитигэр кэлэн күүс-көмө буолбут бар дьоммутугар.

Иван Оюров, Сүлдьүкээр нэһилиэгин баһылыга.

Хаартыскалар олохтоох дьаһалта тиксэриилэрэ

+1
0
+1
0
+1
0
+1
0
+1
0
+1
0
+1
0