Мин ытык Тааттаттан төрүттээх Дьокуускай куорат олохтооҕо Лариса Аввакумова аан дойду үрдүнэн бүрүүкээбит хамсык ыарыыга ыалдьыбыппын дьоҥҥо тиэрдэ охсон, биир эмит киһи туһаныа диэммин бу суруйан эрэбин.
Ааҕан, бэйэни бэлэмнииргэ турунуоххут диэн сыалтан. Хайдах ыарыйдым? Бэйэм атын эминэн эмтэнэ сылдьар буоламмын кыһамматаҕым. Тута сэниэтэ суох буолбутум. Аһыахпын төрүт баҕарбат этим.
Сыыйа хас да хонукка лип сытынан кэбиспитим. Температура суох. Оннук сытан аҕылааһын, сөтөл киирэн скорайданан, ПЦР анаалыһын туттараммын, анаалыһым «положительнай» буоллум. Сатурациям 70 диэри, хааным баттааһына 50 диэри түһэн, Таатта балыыһатын ковиднай отделениетыгар киирэн хааллым. Арааһа, бу Дельта Корона диэн ааттаах ковид көрүҥэ быһыылаах. Биир да симптома суох киирэр эбит. COVID-19 муннугунан киирэр буоллаҕына, бу көрүҥ вируһа тута тыҥаҕа киирэн түргэнник сиир уратылаах эбит. Киһини өлөрүөн да сөп. Бастакы күн КТ көрдөрүүтүнэн 10-15% курдук этэ да, сарсыҥҥытыттан бырыһыан сыыйа тахсан, өссө улаатар сылыктанна. Бэргээтим. Утуйбаппын. Этим-хааным көҕөрөн истэ, анаалыс ылалларыгар биир хааппыла кэлбэт чинчилэнэн, канюля туруоруута буолла. Балаһыанньа ыараата.
Коронавирус «абааһытын» кытта охсуһуу
Мин психическэй да, ньиэрбэ да учуотугар турбаппын. Ол эрээри маннык турукка сытан, хамсык «абааһытын» кытта охсуспуппун суруйуом. Утуйбат диэн эмиэ стресс. Мэйииҥ сынньаммат буоллаҕа. Дьэ, кыратык нухарыйан эрдэхпинэ үрдүбэр икки абааһы түстэ. Абааһыбыт омук сиригэр айыллыбыт дуу? Уопсай быһыылара сарыы кынат курдук, хап-хара уонна илиилэрэ-атахтара уп-уһун. Тип-тилиргэстэр. Энергия бөҕө. Тута сатаан киэр элиттим. Илиилэригэр туох эрэ төгүрүгү тутан уоскуйа олоро хаалбыттара.
Уһуктуум наһаа ыарахан этэ. Кыыһым барахсан, «маама, уһугун», — дии олороро, үрүҥ баттахтаах ийэм эмээхсин эмиэ баара. Иккис күнүгэр эмиэ итинник турукка сыттахпына, биир абааһы испиттэн ойон таҕыста. Истиэнэҕэ хатаастар. Куттаммакка, күүстээх санааны ылан, аттыбар турар иһиккэ уган кэбиһэн баран хаппахтаан кэбиспитим. Итиннэ элбэх сэниэни ыыппыт этим. Уһуктарбар, сиэним уол күлэн, миигин дьээбэлиириттэн уһуктан кэлбитим. Дьэ, ити күнтэн ыла күүспэр күүс эбиллэн, өйүм-санаам олоххо тардыһыыта күүһүрэн барбыта. Ити абааһы — мин туругум, ыарыыны ылыныы уонна олоҕум уһуурун-кылгыырын бэлиэтэ буоларын билэбин. Дьиҥэ маннык турук кимиэхэ баҕарар киирэр дииллэр, сорох дьоннор маннык кэнниттэн бэйэлэрин сүтэрэллэр, психиатрия да ыарыһаҕа буолан тураллар.
Ырыа быыһаабыта
Ити түүн балаһыанньам ыараан, тыыным кылгаан, бэйэм көҕөрөн, утуйбакка сыттахпына, ырыа ыллыыр санаа киирэн кэллэ. Түүн буолан ыарыһахтар утуйа сыталлар. Ол да буоллар, ырыа ыллыырга сананным. Ырыа бөҕөтүн ыллаатым да, уларыйыы суох. Арай, онтон, «Орленок» ырыа көтөн түстэ. Өс киирбэх ыллаатым да, чэпчии түстүм. Салгыным тыҥаҕа сөпкө киирэн кэҥээбиппин биллим. Иккис ырыабынан «Прекрасное далеко» ыллаатым. Һуу, аата үчүгэйиин, умса сытан сөпкө тыынан бэйэбэр үчүгэйи оҥордоҕум. Дьэ, ол сытан санаатым, ырыа эмтиир, киһиэхэ көмөлөһөр эбит дии. Үрдүк вибрациялаах ырыалары ыллаан киһи үтүөрүүһү эбит. Арааһата, операны уонна үрдүк таһымҥа ыллыыр ырыаһыттар бу ыарыынан ыалдьымыахтарын сөп эбии дии санаабытым. Ол түүн аттыбар сытар ыарыһаҕым төрүт уһуктубакка утуйбута. Сарсыарда туран, ырыаларыҥ иһин махтанабын, олус бэркэ утуйдум диэбитэ. Бу кэмҥэ мин хааным хойдон, тыыныыттан уонна умса сытыыттан атыны толкуйдаабакка сытар кэмим этэ. Тыҥам сиэһинэ 75 % буолбут, бииргэ төрөөбүттэрим миигин сүтэрэр буоллубут диэн санаан ылбыттар этэ. Кэлин, быраастан ыйыппыппар, киһи хаана хойуннаҕына, туохха да наадыйбат буолар, ыарыыны билбэккин, кэпсэтэ сытан тыыннара быстар диэбитэ. Миигин ити түүн үрдүк вибрациялаах ырыалар тыыммын уһаппыттарын кэлин билбитим.
Дьэ, ити кэнниттэн санрейс, куорат балыыһатыгар эмтэнии.
Билиҥҥи турук
Бу ыарыы саамай сүрүнэ — тыҥаҕын сиэтээһин. Төһө сиэбит бырыһыаныттан үтүөрэриҥ тутулуктанар эбит. Кыра % буоллаҕына, чэпчэкитик, улахаҥҥа — ыарахан. Балыыһаҕа киирбит күммүттэн кислород аппаратыгар сытабын, умса эрэ утуйабын. Киһи сэниэтэ суох буолар. Аҕылааһын быыһыгар харса суох сөтөллөҕүн. Аһыыгын да, ол сэниэҥ тыҥаҕар салгын киириитигэр көмөлөһөрүн иһин бүтэн иһэр. Онон, кылаабынайа, сэниэҕин харыстыахтааххын.
Ковид ыарыы кэнниттэн доруобуйа биллэ мөлтүүр, харыстаныытын кыайыахха наада. Мин билигин ковид вируһун өлөрөргө саамай күүстээх эмтэнэринэн эмтэнэ сытабын. Күн бүгүн ПЦР «положительнайы» биэрэр. Ол аайы куустээх эмтэр тохтооботтор. Оччотугар организмым иммуннай систиэмэтэ күүстээх охсуулары ылан истэҕэ. Мин түргэнник үтүөрэ охсон, доруобуйабын чөлүгэр түһэриэхпин туохтааҕар да баҕарабын. Иннибэр буолар араас ыарыыларга, эмтэниилэргэ бу коронавирус дьайымыан баҕарабын. Харыстаныы, сөптөөх аһылык, режим, эмп-томп, үчүгэй клиника хайаан да наадаларын өссө да өйдөөтүм. Ыарыы тыҥаҕын төһө сиэппиккиттэн тутулуктаах буоларын биллим. Бу күннэргэ ыалдьан киирии күн-түүн элбээн иһэр. Кинилэри эмтиир сорук эмиэ турдаҕа. Онон, реабилитацияны сөпкө өйдөөн, күүскэ эмтэнии наада. Бу ыарыыттан элбэх да киһибитин сүтэрдибит. Ити барыта бу ыарахан ыарыы содула.
Сүбэлэрим:
1. Бастатан туран, сөпкө тыынарга үөрэниҥ. Бары дьиэ кэргэнинэн. Кырдьаҕас дьоҥҥутун умса сытыаран тыынарга эрчийиҥ. Бу ыарыыга ыарыйдыҥ да, умса сытан, сөпкө тыыныы ирдэнэр. Төһөлөөх элбэх кырдьаҕаспытын сүтэрдибит? Барахсаттар эдэр сылдьан элбэхтэ тоҥон-хатан, хоргуйууну, сэриини ааһан, аас-туор олохторуттан уҥуохтара токуруйбут, ковида да суох сатаан киһилии толору тыыммакка, көнөтүк хаампакка сылдьар дьон, өссө умса сытан тыынары сатыахтарай? Ол иһин, бэйэлэригэр көмө оҥорор кыахтара суох буолан, эмкэ эрэ сытаннар элбэх кырдьаҕастарбыт суорума суолланнылар. Киһи эрэ хомойор.
2. Дьиэ кэргэнинэн ыллааҥ, үҥкүүлээҥ. Төрөппүттэр оскуолаҕа оҕолоргутугар сөпкө тыыныы куруһуоктарын, муусука уруоктарыгар үрдүк вибрациялаах ырыалары үөрэтэллэрин модьуйуҥ.
3. Бу Ковид ыарыынан кырдьаҕас дьону куттаамаҥ, «ыарыйдыҥ да өлүөҥ», «бу ыарыыга хаптардыбыт да, бүттүбүт, иэдээн» диэн тылларынан буолбакка, төттөрүтүн, өй-санаа өттүнэн ылынан, түбэстэ да тулуйан эмтэнэргэ субэлээҥ. Элбэх киһи кутталыттан да бэринэр.
Доруобуйаҥ — эн баайыҥ, эн олоҕуҥ!
edersaas.ru саайтка анаан Лариса Аввакумова.