Sakha Innovation быыстапка ыһыах дьонун түмтэ

Ааптар: 
Бөлөххө киир:

Туймаада ыһыаҕар сыллата быыстапка арааһа ыытыллар үгэстээх. Олортон биирдэстэринэн саҥаны, сонуну толкуйдаан, тобулан, оҥорон таһаарааччылар быыстапкалара буолар.

Саҥаны тобулан, толкуйдаан оҥорооччулар уонна тупсаран биэрээччилэр бэлиэ күннэрин көрсө, Үс Хатыҥҥа «Sakha Innovation» быыстапка арыллыыта үөрүүлээх быһыыга-майгыга буолла. Дохсун ытыс тыаһыгар доҕуһуоллатан аалай кыһыл лиэнтэ быһылынна.

СӨ Инновацияҕа уонна цифровой сайдыыга миниистирэ Анатолий Семенов бу тэрээһининэн  ураты толкуйдаах саҥа, сонун үлэлэри, бырайыактары дьоҥҥо-сэргэҕэ киэҥник билиһиннэрэр, тарҕатар сыаллаах-соруктаах оҥороллорун тоһоҕолоото.

Тэрээһиҥҥэ хамаандалар, урбаанньыттар бэйэлэрин сонун оҥоһуктарын туруорбуттар. Манна киһи сонургуу, сөҕө, хайгыы көрөрө элбэх. «Бигэ» дьиэҕэ-уокка кыраасканы оҥорор собуот үлэһиттэрэ лаах, кырааска арааһын көрдөрө аҕалбыттар. Этэллэринэн дьиэ иһигэр, таһыгар, тимиргэ, бэл, кафельга кытта туттуохха сөп эбит. «Икки күнүнэн олус үчүгэйдик куурар. Сыта суох. Истиэнэ кырааскатын быыллыйдаҕына сууйуохха-сотуохха да сөп. Кырааската онтон айгыраабат», — дэһэллэр быыстапкалааччылар.

«Сахафильтр» ХЭУо ууну ыраастыыр тэриллэри аҕалан көрдөрүүгэ туруораллар. Тэрилтэлэргэ анаммыт фильтрдар иккилии-үстүү сыл туох да эҥкилэ суох үлэлииллэрин, ол кэнниттэн ыраастаан биэрэр наадатын бэлиэтииллэр. Кэпсээбиттэринэн, куорат да, тыа да сирин тэрилтэлэрэ сонурҕаан балачча ылбыттар.

Hotutent бу да сырыыга дьону-сэргэни түмүөн түмтэ. Төһө да бу күн өҥүрүк куйаас сатыылаатар, тымныыны киллэрбэт таҥаһы-сабы, балаакканы ордук эр дьон сыныйан көрдө-иһиттэ.  Салгыны ититэр  тэрили, кальций-сигостины, саха чэйин,о.д.а.  сураһааччы элбээтэ.

Намтан кэлбит «ИТ-Долина Эҥсиэли» биир кэлим цифровой экотиһиги тэрийбит дириэктэр Саргылаана Петрова:

—Быйыл саҥа үлэлээн эрэбит эрээри, дьон-сэргэ аныгы олох сиэринэн, сэҥээрэрэ-сэргиирэ улаатан иһэр. Холобур, аҕам саастаахтары биһиги компьютерынан туһанарга, бэчээттииргэ, интэриниэккэ киирэргэ үөрэтэбит. Наһаа сөбүлүүллэр. Билиҥҥи үйэҕэ оскуола оҕолоро сололоро суох. Үөрэхтэрин кэнниттэн куруһуоктара, эбии дьарыктара элбэхтэр. Ол иһин, кинилэргэ табыгастаах буоллун диэн, учууталлары анаан саҥаттан-саҥаҕа, программа оҥорорго, мобильнай сыһыарыыга, о.д.а. үөрэтэн иһэбит. Кинилэр оскуолаларыгар тиийэн оҕолорун үөрэтэллэр.

Биир уратынан, Дьокуускай куораттан анаан-минээн ыалдьыт ыҥыран таһаараммыт, баҕалаахтары хаартыскаҕа хайдах түһэрэргэ, чочуйарга,тупсаран биэрэргэ үөрэттэрбиппит. Дьоммут-сэргэбит ону олус сөбүлээбиттэрэ, сэҥээрбиттэрэ. Мантан да салгыы этэҥҥэ үлэлээн, сонуну, саҥаны билэн-көрөн дьоммутугар тиэрдэн иһэр баҕалаахпыт, — диэтэ Саргылаана Ильинична.

+1
0
+1
0
+1
0
+1
0
+1
0
+1
0
+1
0