Маны аах Уопсастыба

Үс Хатыҥҥа Саха сирин волонтердара бастакытын сүлүөттээтилэр

Ыам ыйын 12 күнүгэр Дьокуускайга Үс Хатыҥ аттыгар Саха сирин волонтердарын бастакы сүлүөттэрэ буолан ааста. Ыччат хамаандаларга арахсан, суһал түгэҥҥэ хайдах быһыылаахтык быыһыыр үлэни ыытарга, көмө оҥорорго, тиэхиньикэни, дьону кытта үлэлииргэ үөрэннилэр, күрэхтэстилэр.

Ааспыт сайын кураантан өтөрүнэн буолбатах баһаардар турбуттарыгар, Саха сирин патриоттара баҕа өттүнэн уоту утары охсуһууга кыттыбыттара. Аҕыйах күн иһигэр элбэҕи оҥорор кыахтаах күүс түмүллэн, оннук курдук түргэнник бэрээдэктэммит тэриллиигэ кубулуйан, ааҥнаабыт иэдээни утары улахан көмөнү оҥорбуттара. Саха сирин Бырабыыталыстыбата бу сүүрээни өйөөн, доброволецтар түмсүүлэрэ эбии күүһүрбүтэ, сааһыламмыта, үлэҕэ туһалаах сэбинэн-сэбиргэллэринэн хааччыллыбыта. Ааспыт сыл уоттаах кэмэ уҕараабытын кэнниттэн, бу түмсүү кэлэр сылларга туһалааҕын өйдөөн, хамсааһын сайда турарыгар үлэ ыытыллыбыта.

Саха сирин волонтердарын сүлүөтүн бэрт элбэх тэрилтэ түмсэн ыытта. Сүрүн тэрийээччилэринэн «Добровольческий штаб Республики Саха (Якутия)», «Спецназ добра», АНО ДПО УЦ «Спасатель», өрөспүүбүлүкэтээҕи «Таланты Якутии» күрэс «Не дай огня!» бырайыагын бөлөҕө, Саха сирин волонтердарын киинэ, ВОСВОД, Бүтүн Арассыыйатааҕы баһаары утары добровольнай уопсастыба уо.д.а. буоллулар. Бу тэрилтэлэр бииргэ түмсэн уоту умуруоруу кэмигэр хайдах туттарга-хаптарга саҥа доброволецтары үөрэттилэр. Аттынааҕы эрэгийиэннэртэн суостаах сурахтар кэлэ турар кэмнэригэр, маннык үөрэх тыыны быыһыыр суолталааҕа кими да саарбахтаппат.

Ыҥырыылаах ыалдьытынан Иркутскай кыраай «Аварийная пожарно-техническая служба» тэрилтэ буолла. Бу Сибииргэ сытар эрэгийиэн бэрт өр кэм устата ойуур баһаардарыттан эмсэҕэлиир, умайа турар тайҕаҕа үлэни ыытарга улахан уопуттаах. Иркутскай бөлөҕүн салайааччыта Руслан Рашидович Байбеков бу курдук кэпсиир:

— Тайҕа умайарын кэтээн көрөрбүтүнэн, биһиги диэки биэс сыллаах кэм эргиирэ олоҕурбут. Онон уоту утары охсуһууга волонтердар, доброволецтар түмсүбүттэрэ балай эмэ ыраатта. Айылҕабыт эһиэнигэр майгынныыр, сүрүн уратыта, мин көрөрбүнэн, биһиэхэ сүрүннээн бэс чагда элбэх, Саха сиригэр тииттээх тыалар үгүстэр. Тэриллии өттүгэр манна волонтердар уонна былаас ыкса үлэлэһэллэрин сөҕө, ымсыыра көрдүм. Биһиги олохтоох бырабыыталыстыбабытыттан көмөнү бэрт эрэйинэн, көрдөһөн-ааттаһан ылабыт. Бу тэрээһин үтүө санаалаах хорсун ыччакка улахан туһалаах буоларыгар бүк эрэнэбин.

Кырдьык, сүлүөт үлэтэ саалаҕа олорон лиэксийэ сурунартан туспа, илии-атах күүһүн ирдиир дьиҥнээх үөрэх буолла. ЫБМ министиэристибэтин, Саахал мэдиссиинэтин, Саха сирин быыһыыр сулууспатын, Судаарыстыбыннай баһаарынай сулууспа, «Якутлесресурс» үлэһиттэрэ волонтердар иннилэригэр туран үөрэх ыыттылар. Шланганы туһаныы, ранцевай помпаны, огнетушителы кытта үлэ, эчэйбит киһи көстөр баастарын эмтээһин, мөлтөөһүн көстүбэт сибикилэрин таайыы – маны барытын идэтийбит үлэһиттэр, быраастар, быыһааччылар волонтердарга көрдөрдүлэр, үөрэттилэр.

Былырыын ойуур баһаарын умуруорууга тус бэйэтэ ыкса үлэлэспит актыбыыс Айыл Дьулурха ыксаллаах түгэҥҥэ хайдах үлэлиири, быыһанары дьиҥнээх уопутугар олоҕуран кэпсээтэ:

— Оҕолорго кэпсээбит сүрүн үөрэҕим бэйэни харыстаныы сүрүн сорук буоларын тиэрдээһин. Ыксаллаах кэмҥэ ыгылыйбыт киһиэхэ сөптөөх быһаарыныыны ылынар уустук буолааччы. Холобур, мөлүйүөнүнэн сууммалаах тэрили быыһыыр дуу, эбэтэр бэйэ тыынын харыстыыр дуу түгэн үөскээтэҕинэ, волонтер бэйэтин тыынын быыһыахтааҕын чиҥэтэн кэпсиибин. Киһи олоҕо муҥура суох күндү. Уот, буруо ортотугар сөптөөх быһаарыныыны тута ылыныы олоҕу быыһыыр. Ол туһугар аналлаах сулууспалар быраабылаларын кытта бэйэм кэтээн көрүүлэрбин холбоон ыччаты үөрэтэ сатаатым.

Биир күн устата волонтердар суһал быһыы-майгы кэмигэр туһалыыр билиилэри ыллылар, бэйэ икки ардыгар күрэхтэстилэр. Өскөтүн ааспыт сайын буолбут алдьархай хатыланар түгэнигэр бу эдэр дьон ордук ситиһиилээхтик, куттала суохтук тутталларыгар-хапталларыгар улахан үлэ ыытылынна.

Ааптар хаартыскалара.

0
0
Telegram @edersaas20