СӨ Экологияҕа министиэристибэтэ: биир гектардаах кэрдиллибит сир оннугар оччо ойуур үүннэриллиэхтээх

2019 сыл тохсунньу 1 күнүттэн «О компенсационном лесовосстановления» диэн федеральнай сокуон олоххо киириэҕиттэн кэрдиллибит сири чөлүгэр түһэрии ойуур учаастагын арендаҕа ылбыт тэрилтэҕэ сүктэриллэр.

Бу сокуон ойуур иһигэр баар маһа суох, эбэтэр маһа умайбыт сирдэри – мас үүнэр туруктаах сирдэри чөлүгэр түһэрии сүрүн тосхоллорун таарыйар.
212-с №-дээх (19.07.2018), 01.01.2019 сылга ылыллыбыт федеральнай сокуоннар уонна РФ Ойуурун Кодексатын 43-с, 44-с, 45-с, 46-с ыстатыйаларын чэрчилэринэн, РФ субъектарын территорияларыгар кэрдиллибит сирдэргэ оччо ойуур хайаан да чөлүгэр түһэриллиэхтээх. РФ Ойуурун Кодексатын быһыытынан сир баайын туһаҕа таһаарыыга геологическэй чинчийиилэри ыытыыга уонна линьиэйнэй дэниллэр эбийиэктэри үлэлэтиигэ мас кэрдиллибит сирэ эмиэ хайаан да чөлүгэр түһэриллэригэр бары өттүнэн сөптөөх үлэ ыытыллара булгуччулаах. Ол быһыытынан мас кэрдиллибитин кэнниттэн биир сыл аһардыллыбакка, РФ Бырабыыталыстыбатынан бигэргэниллибит бэрээдээгинэн, анал бырайыак бэлэмнэниллэн ойууру чөлүгэр түһэрии үлэтэ ыытыллыахтаах.
Ол аата сири арендалааччы кэрдибит сиригэр оччо иэннээх сиргэ ойууру чөлүгэр түһэрэргэ сөптөөх үлэни ыытыахтаах. Бу сокуон чэрчитинэн, Саха сиригэр ойуур чөлүгэр түһэрии үлэлэрэ 2018-2019 сылга ыытыллыбыттар. Бүгүҥҥү күҥҥэ ойууру арендалаан туһанааччылартан 9173,1263 гектардаах сири чөлүгэр түһэриигэ 65 сайабылыанньа киирбит.
Чөлүгэр түһэриллиэхтээх сир ойуур пуондатыгар киирэ сылдьарын туһунан иһитиннэрии СӨ Экологияҕа, айылҕа ресурсатын туһаныыга уонна ойуур хаһайыстыбатыгар министиэристибэтин официальнай сайтыгар «Деятельность» уонна «Лесное хозяйство» диэн түһүмэхтэргэ ыйылла сылдьар (https://minpriroda.sakha.gov.ru/lesnoe-hozjajstvo).
Итини тэҥэ, олордуллуохтаах мастары үүннэриинэн дьарыктанар дьон тустарынан иһитиннэрии «Рослесозащита» ФБУ сайтыгар эмиэ баар.
Ойууру хаттаан олордуу, ойууру үүннэрии Ойуур сокуоннарын ирдэбилин кэһэр түгэҥҥэ РФ Кодексатын 8.27 ыстатыйатынан административнай миэрэ ылыллан, дуоһунастаах дьоҥҥо 5000 солк. саҕалаан 10000 солк. диэри уонна тэрилтэлэр 200 тыһ. солк. саҕалаан 300 тыһ. солк. диэри ыстырааптаныахтарын сөп.

СӨ Экологияҕа министиэристибэтин пресс-сулууспата

Хаартыска ЯСИА