СӨ Бырабыыталыстыбата пилотнай нэһилиэнньэлээх пууннар гааһынан сылытыыга көһүүлэригэр ороскуот 75% уйунуоҕа
Саха сирин Бырабыыталыстыбата өрөспүүбүлүкэ бүддьүөтүттэн сэттэ пилотнай нэһилиэнньэлээх пууҥҥа кииннэммит ититииттэн кэтэх гааһынан сылытыныыга көһүү ороскуотугар 75 % диэри субсидия көрөргө былаанныыр. Бу туһунан эрэгийиэн бырамыысыланнаска уонна геологияҕа миниистирэ Максим Терещенко “Актуальное интервью” биэриигэ иһитиннэрдэ.
edersaas.ru
2020-2024 сылларга кииннэммит ититииттэн кэтэх гааһынан сылытыныыга көһүү бырагырааматыгар сэттэ пилотнай нэһилиэнньэлээх пуун Чурапчы, Горнай уонна Бүлүү оройуоннарыттан кыттыахтара:
– Чурапчы с., Чурапчы оройуона;
– Дириҥ с., Чурапчы оройуона;
– Бэрдьигэстээх с., Горнай оройуона;
– Толоон с., Чурапчы оройуона;
– Туора Күөл с., Чурапчы оройуона;
-Үрүҥ Күөл с., Чурапчы оройуона;
– Эбэ с., Бүлүү оройуона.
“Бырагыраамаҕа тутаах түгэн – хас биирдии дьиэ гаас оттукка көһүүтүн ороскуотун субсидиялааһын. Гаас турбатын учаастакка тардалларыгар дьиэлээх киһи ороскуоту сүгэр: гаас турбатын тутуу, гаас турбатын ис үлэлэрэ, хочуолу туруоруу уо.д.а. Ол иһин бырагыраама нэһилиэнньэҕэ табыгастаах буоларын курдук оҥоһулунна”, — диэн быһаарда миниистир.
Олорор дьиэни гаастааһыны кытта сибээстээх маннык ороскуоттар толуйуллуохтара:
Гаас утаҕын тутуу – олорор дьиэҕэ тардыы;
Дьиэ тас өттүнэн аҕалыы;
Ис утаҕы тутуу;
Тэрили атыылаһыы (гаас хочуола, гаас билиитэтэ, счетчик, радиатордар);
Тэрили туруоруу;
Тэрили холбооһун;
Ититии ситимин таҥыы.
Бу этиллибит бырагыраама эрэгиийэн бүддьүөтүн кэмчилииргэ эмиэ көмөлөһүөҕэ. 2019 сыл чахчытынан, хомунаалынай комплекс тэрилтэлэрин бүддьүөттэн субсидиялааһын 24 млрд тахса солкуобайга тэҥнэспитэ.
Бырагыраама үлэҕэ киирдэҕинэ өрөспүүбүлүкэ олохтоохторо хомунаалынай өҥөлөргө сылга 3000 солкуобайга диэри кэмчилиэхтэрэ, оттон 2024 сыл кэнниттэн госбүддьүөт 1 млрд тахса солкуобайы кэмчилиэҕэ.
Бырагыраама туһунан маннык ссылканан киирэн көрүҥ: https://minprom.sakha.gov.ru/files/front/download/id/2335825 Саха сирин Бырамыысыланнаска уонна геологияҕа министиэристибэтин саайтыгар.
Бэлэмнээтэ Женни СТРЮКОВА, edersaas.ru