СӨ Бырабыыталыстыбата Ил Түмэҥҥэ педагогтар бырааптарын көмүскүүр этиини киллэрдэ
СӨ Бырабыыталыстыбата Ил Түмэн “Үөрэх туһунан” сокуоҥҥа педагогтар бырааптарын көмүскээн уларытыылары киллэрэригэр этии көтөхтө.
edersaas.ru
Сэтинньи 21 күнүгэр Ил Түмэн пленарнай III уочараттаах мунньаҕар “СӨ Үөрэҕин туһунан” сокуон 22-с ыстатыйатыгар уларытыылары киллэрии бырайыак барыла бастакы ааҕыыга ылылынна. Бу судаарыстыбаннай түмүктүүр аттестацияны (ГИА) бэлэмниир уонна ыытар педагогтар компенсацияларын төлөбүрүн туһунан буолар.
Санатан эттэххэ, быйыл от ыйын 3 күнүгэр РФ бэрэсидьиэнэ Владимир Путин “РФ Үөрэх туһунан” федеральнай сокуон 47-с ыстатыйатыгар уларытыылары бигэргэппитэ. Сокуон 2019 сыл тохсунньу 1 күнүттэн олоххо киирэр.
“Сүрүн уопсай уонна орто уопсай үөрэхтээһин бырагырааматынан судаарыстыбаннай түмүктүүр аттестацияны (ГИА) ыытыыга кыттар педагогическай үлэһиттэргэ, ыйыллыбыт судаарыстыбаннай аттестацияны бэлэмэнээһиҥҥэ уонна ыытыыга үлэлэрин иһин компенсация төлөнөр”, — диэн “РФ Үөрэх туһунан” федеральнай сокуон 47-с саҥа ыстатыйатыгар ыйыллар.
Уларытыыларга олоҕуран, педагогтарга судаарыстыбаннай түмүктүүр аттестацияны (ГИА) ыытыы түмүгэр сүтэрбит хамнастарын уонна атын ороскуоттара булгуччу төнүннэриллиэхтээх.
Бу төлөбүр кээмэйин Саха сиригэр СӨ Бырабыыталыстыбата быһаарыаҕа, субъекка түмүктүүр судаарыстыбаннай эксээмэни ыытыы судаарыстыбаннай бүддьүөт үбүлээһиниттэн төлөнүөҕэ.
Сокуон барылын Ил Түмэн дьокутааттара бастакы ааҕыыга ылыннылар.
СӨ Ил Дарханын уонна СӨ Бырабыыталыстыбатын пресс-сулууспата.