СӨ Билимин аччыгый академиятын үөрэтэр лабаратыарыйалара аһылыннылар
Тохсунньу 22 күнүгэр СӨ Билимин аччыгый академиятын баазатыгар (Хаҥалас улууһун Чапаево сэлиэнньэтэ) “Үөрэх” национальнай бырайыак “Хас биирдии оҕо ситиһиитэ” федеральнай бырайыагын иитинэн хааччыллыбыт үөрэх лабаратыарыйаларын аһыллыыта буолла.
Аныгы тэрилинэн маннык хааччыйыы өрөспүүбүлүкэ, “Үөрэх” национальнай бырайыак чэрчитинэн талааннаах оҕолору булар уонна сайыннарар эрэгийиэннээҕи кииннэри өйүүр федеральнай субсидияҕа хапсыытын түмүгэр ситиһилиннэ. Манна 11 лабаратыарыйа уонна хайысхаларынан кэбиниэттэр киирэллэр: физика; энергиэтикэ; археология; тургутар полигон; фаблаб; телестудия; IT-киин; медиастудия; аэрокосмическай лабаратыарыйа; универсальнай лабаратыарыйа уонна коворкинг-саала.
Тэрээһиҥҥэ СӨ Үөрэҕин уонна билимин миниистирин бастакы солбуйааччы Михаил Юрьевич Присяжнай, Билим аччыгый академиятын ректора Василий Климович Павлов кытыннылар.
Тэрээһин кыттыылаахтара саҥа лабаратыарыйаларга оҕолор физика, химия, биология, информатика, математика, робототехника, программирование, арктическай материаловедение, хайа инженерията, Саха сирин палеонтологиятын фауната, аэрокосмическай инженерия, Арктика энергиэтикэтэ, “большие данные”, “машиннай үөрэтии”, искусственнай интеллект, криолитозонаҕа тымныы сайдыыта, Арктика тулалыыр эйгэтин экологиятын кэтээн көрүү, Саха сирин аһылыгын куттала суох буолуута, биотехнология курдук билим хайысхаларын дириҥэтэн уонна көдьүүстээхтик үөрэтиэхтэрэ диэн бэлиэтээтилэр.
Билиминэн умсугуйар, дьоҕурдаах уолаттар, кыргыттар, норуоттар икки ардыларынааҕы уонна Бүтүн Арассыыйатааҕы кэмпириэнсийэлэр, куонкурустар уонна олимпиадалар кыайыылаахтара, призердара мустуохтара. Эпидемиологическай балаһыанньа бигэтэ суоҕунан сибээстээн, СӨ Ил Дарханын 2022 сыл тохсунньу 14 күнүнээҕи 2267 №-дээх “СӨ Ил Дарханын туспа быраапка аактарыгар уларытыылары киллэрии туһунан” уурааҕар сөп түбэһиннэрэн, Билим аччыгый академиятын саҥа үөрэтэр куорпуһун аһыллыыта барыллаан кулун тутар ыйга көһөр диэн СӨ Үөрэҕин уонна билимин министиэристибэтэ чопчулуур.
СӨ Үөрэҕин уонна билимин министиэристибэтин пресс-сулууспата.