Сылы хайдах көрсөҕүн да, оннук атаарыаҥ диэн нууччалар этэллэр. Үүнээри турар саҥа сылы көрсүү ордук ураты буолара буолуо дии саныыбын. Дьон быйыл хаһааҥҥытааҕар даҕаны эрдэ Саҥа дьылы көрсөргө бэлэмнэнэн саҕалаата. 2021 сыл үрүҥ тимир оҕус бэлиэлээх, онон астрологтар сүбэлииллэринэн, бырааһынньыгы дьиэҕэ баай-талым астаах, бэһиэлэйдик ылыахтаах эбиппит.
Оҕус, кырдьык, кыһыл дьүһүнү сөбүлээбэт дуо?
edersaas.ru
Саҥа дьыл үүнэр түүнүгэр хайдах таҥаһы кэтэрбит эмиэ улахан оруоллаах. Сүрүн быраабыла – харахха наһаа быраҕыллар, чаҕылхай дьүһүннэри, олус эгэлгэлээх истиили талыма. Айылҕа дьүһүннэрин курдугу, уоскутар дьүһүннээҕи таҥнар ордук.
Үрүҥ тимир оҕус бэлиэлээх сылга сиэрэй, халлаан күөх сырдыга, үрүҥ көмүс, маҥан, араҕастыҥы сырдык дьүһүннэри тала сатаа. Бу барыта «чуумпу» дьүһүннэр, онон, оҕус маннык өҥү сөбүлүү көрүөҕэ.
Маны таһынан, кэлэр сылга тугу баҕараргытынан сиэттэрэн, таҥаскыт дьүһүнүҥ талыаххытын сөп диэн астрологтар этэллэр. Холобура, элбэх харчыны баҕарар буоллаххына, маҥан таҕаһы кэт. Кэлэр сыл тапталгын көрсүөххүн баҕараҕын? Оччоҕо сырдык сиэрэй былааччыйалаах, куопталаах Саҥа дьылы көрүс.
Сиэмэх кыыл ойуулаах таҥастары кэтимэ. Леопард, баабыр, эриэн үөн курдук кыыллартан оҕус куттанара, сиргэнэрэ чуолкай.
Оҕус кыһыл дьүһүнү сөбүлээбэт диэн санаа испанскай корридаттан аан дойдуга тарҕаммыт. Ол эрээри, дьиҥэ оҕус дьүһүнү араарбат эбит. Кини көннөрү хамсыыр эбийиэктэргэ муоһунан түһэр. Торреодор кыһыл дьүһүннээх таҥаһы көрөөччү болҕомтотун тардаары талар эбит. Бу киэҥник тарҕаммыт өйдөбүл дьон санаатын салайар, уларытар. Оттон элбэх киһи санаабыта син биир туох эрэ ураты күүскэ кубулуйар диэн бэйэм саныыбын. Онон, кыһыл таҥаһы кэппэккит ордуга буолуо.
Виктория Бястинова, edersaas.ru