Ханнык баҕар ыалга биир саамай сүрүн ороскуотунан аһы-үөлү уонна таҥаһы-сабы атыылаһыы буолар.
edersaas.ru.
Дьиэ кэргэн бүддьүөтүн көдьүүстээхтик туттар туһугар ороскуоту кыччатан, харчыны “өйдөөхтүк” туттар наада. Дьиэ кэргэн бүддьүөтүн аска, таҥаска хайдах экэниэмийэлиэххэ сөбүй?
Нина Томская, түөрт оҕо ийэтэ:
— Маҕаһыыннарга, ырыынактарга оҕо хараҕын иирдэр таҥас-сап, аһыыр ас арааһа элбээн, улахан дьиэ кэргэн оҕо баҕарбытын барытын ыларыгар ыарахан. Биһиги ыал икки кыыс, икки уол оҕолоохпут. Эдьиий кэппитэ балтыга, убай кэппитэ быраакка барар. Билиҥҥитэ уолаттарбыт кыра буоланнар, элбэҕи көрдөөбөттөр, оттон кыргыттарбыт улаатаннар, көрдөбүллэрэ үрдээн иһэр. Хата, уҥуохтарынан эгил-тэгил буолан абырыыллар, онон иккиэннэригэр биир размер таҥаһы ыларбытын атастаһа сылдьан кэтэллэр.
Ыарыйдахтарына, эми-тому кыраларбытыгар аптекаттан ылабыт, улахаттарга бөрө ото, алтан төбө, уулаах отон, дөлүһүөн уо.д.а. курдук эмтээх оттору, үүнээйилэри туттабыт. Эмтээх от доруобуйаны чэбдигирдэргэ туһалаах уонна сыаната да удамыр.
Аһы-үөлү кууһунан атыылыыр маҕаһыыннартан уонна ханна чэпчэтии буолар сириттэн ылабыт. Ыйдааҕы аска испииһэк оҥорон баран, аҕабытын ыытан ылларабын, мин бэйэм бардахпына, көрбүппүн барытын хомуйан, ороскуотум элбээн тахсар. Дьоммут хотуттан кыһын арыы, эт, балык, оттон сайын үрүҥ аһы, сир аһы, туустаах балыгы ыытан көмөлөһөллөр. Ону сыа-сым курдук тутан астыыбын. Оҕолорбут собо ыһаарытын, миинин сөбүлүүллэр. Мокоруону мээнэ ылбаппын, сахалыы лапса оҥорорум быдан тотоойу уонна минньигэс. Аны наар биир миининэн, торуойунан олорбоппут. Кыргыттарбын кытары этинэн, балыгынан араас бүлүүдэни астыыбын. Холобур, балык бөрүөгүн оҥоробун, эти французтуу астыыбын, собону духуопкаҕа буһарабын. Минньигэһи мээнэ ыла сатаабаппын, пиццаны, бэчиэнньэни, баахыланы, хортуоппуй фритин, кексы үксүн бэйэм кыргыттарбын көмөлөһүннэрэн астыыбын. Бу курдук, ааҕан-суоттаан дьаһанар, бэйэ астыыр-үөллүүр буоллаҕына, харчы мээнэ туттуллубат.
Евдокия Слепцова, «Саха сирэ» edersaas.ru.