СӨ Айылҕа харыстабылын министиэристибэтэ: Амма өрүс аттынан мас кэрдиллиэ суоҕа
Социальнай хабааннаах ситимнэргэ уонна батсаап мессенджергэ Амма баһыгар маһы кэрдэргэ көҥүлү биэрэргэ быһаарыы тахсыбыт диэн суруйуу тарҕанна. СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрэринэн, «Ангара” уонна “Вудленд24” ХЭУо-лар 2019 сыл ахсынньы 30 күнүгэр ыытыллыбыт аукцион түмүгүнэн ойуур учаастагын арендаҕа ылыыга дуогабары түһэрсибиттэрэ.
Салгыы дуогабар усулуобуйатын быһыытынан тустаах тэрилтэлэр анал бырайыактарын оҥорон баран, судаарыстыбаннай бэрэбиэркэҕэ (экспертизаҕа) биэрбиттэрэ. Судаарыстыбаннай экспертиза көрөн-истэн баран кэккэ сыыһалар-халтылар баалларын быһаарбыта. Ол курдук, сүтэн-симэлийэн эрэр мастары, талахтары, араас үүнээйилэри, Кыһыл кинигэҕэ киирбит кыылы-сүөлү ситэ ыйбатахтар уонна аһара сиппит мастары кэрдиллиэхтээх былаһааккаларын сөпкө көрдөрбөтөхтөр. Мантан сылтаан судаарыстыбаннай бэрэбиэркэ бырайыактары ылымматах. Ойуур маһын туһаҕа таһаарыы бырайыактара судаарыстыбаннай бэрэбиэркэни ааспатаҕын кэнниттэн көннөрүүнү оҥорон баран хат көрүүгэ биэрбиттэрэ. Бырайыагы иккистээн көрүүгэ уопсастыбаннас этиитэ барыта учуоттаммыта биллибитэ. Ол курдук, бастакы уочарат ойуур маһын туһаҕа таһаарыыга аналлаах РФ Ойуурга Кодексата, итини тэҥэ, «Об утверждении состава проекта освоения лесов и порядка его разработки» диэн 2012 сыллаахха тахсыбыт Рослесхоз бирикээһэ барыта учуоттаныллан оҥоһуллубут. Салгыы айылҕа харыстабылын прокуратурата уонна федеральнай антимонопольнай сулууспата бэрэбиэркэлээн баран, аукционы ыытыыга сыыһа-халты суох диэн быһаарбыттара. Уопсастыбанньыктар туруорсууларынан «Ангара» ХЭУо мас кэрдиитин былааныгар уларытыыны киллэрэн, Амма өрүс уонна үрүйэлэр кытыыларынан маһы кэрдии ыытыллыа суохтаах диэн сөптөөх быһаарыыны ылыммыттара. Онон ону бырайыактан ылан кэбиспиттэрэ. Нэһилиэнньэ ити сирдэргэ маһы кэрдиини болҕомтоҕо ылбытынан сибээстээн, ити учаастактары тустаах тэрилтэлэр (надзорнай уорганнар) уонна уопсастыбаннай экологтар оһуобай хонтуруолга туталлар. Ол курдук ити учаастактарга маһы кэрдиигэ ханнык эмит сыыһа-халты тахсар түгэнигэр суут быһаарыытынан аренда дуогабарын көтүрүү миэрэлэрэ ылыллыахтарын сөп. Мас соҕотуопкатыгар кэрдии технологията барыта чуолкайдык тутуһулуннаҕына, ойуур хаһаайыстыбатыгар алдьатыылаах хорумньу тахсыа суоҕа. СӨ экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ кылаабынай леснигэ Алексей Агеев этэринэн, аренда дуогабарын көтүрүүгэ суут быһарыыта наада. Бүгүҥҥү туругунан, суукка ким даҕаны тиийэ илик.
СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ