Бүгүн СӨ Судаарыстыбаннай Мунньаҕа (Ил Түмэн) тыа хаһаайыстыбатын сирин мелиорациялааһын уонна уу ситимин, тыа хаһаайыстыбатын уунан хааччыйар эбийиэктэрин туһаныы, чөлүгэр түһэрии боппуруоһугар парламентскай чааһы ыытта.
Кэпсэтиини Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин иилээн ыытта. Өрөспүүбүлүкэ тыатын хаһаайыстыбатын миниистирэ Александр Атласов кылгастык дакылааттаата.
“Мелиорация управлениета” тэрилтэ көрүүтүгэр 94 тыһ гектар мелиорацияланар сир баар, итинтэн 39 тыһ. гектара туһаныллар.
Миниистир этэринэн, өрөспүүбүлүкэҕэ мелиорацияны сайыннарыыга туспа бырагыраама баар. Кэнники 10 сыл устата бырагырааманы олоххо киллэриигэ өрөспүүбүлүкэ бүддьүөтүттэн 3 млрд 372 мөл солк., федеральнай бүддьүөттэн 339 мөл солк көрүллүбүт.
Быйылгы былаан — 462 мөл солк. Бу былаантан 434 мөл солк. “Мелиорация уонна тыа хаһаайыстыбатын уунна хааччыйыы управлениета” тэрилтэ ыытар үлэлэригэр туһаныллар эбит.
Быйыл сир учаастактарын межеваниетын бырайыактарын бэлэмнээһиҥҥэ уонна кадастр үлэтин ыытыыга 4,6 мөл солк. көрүллүбүт.
Ону сэргэ 2022 сылга 7 индикатор (мелиоративнай тиһиги хааччыйыы, гидротиэхиньиичэскэй тутуулары хааччыйыы, ууну бырахтарыы, страховкалааһын, хапытаалынай өрөмүөн, кадастр үлэтин ыытыы) быһаарыллыбыт.
Управление балаансатыгар ууну халытан, мунньан нүөлсүтүүгэ 41 ситим, 75 шлюз-регулятор уонна 27 быһыт баарын туһунан аҕынна. 131 куурдар ситимтэн 80 ситими чөлүгэр түһэриэххэ наадата ыйылынна.
Салгыы мелиорация бырагырааматыгар тохтууругар миниистир А.Атласов 196 гидротиэхиньиичэскэй тутуу баарын эттэ. Күн бүгүн итинтэн 15 – уһуллуохтаах, 17-тэ – саҥардыллыахтаах, 18-һа –хапытаалынай өрөмүөннэниэхтээх.
Уу ситмнэрин үлэлэригэр тохтууругар кини “Өлүөнэ-Туора Күөл” уу ситимэ 6 нэһилиэги , “Өлүөнэ-Мүрү” уу ситимэ 5 нэһилиэги хааччыйалларын бэлиэтээтэ. Инникитин мелиорация эбийиэктэрин кадастровай үлэлэрин үбүлээһин боппуруоһа турарын тоһоҕолоон бэлиэтээтэ.
Парламентскай чааска бу салааҕа тиэхиньикэ эргэрбитэ бэлиэтэннэ. Ол курдук, бульдозердар, погрузчиктар эргэлэр, таһаҕас массыыната 80-с сыллардааҕыта дьокутааттары сөхтөрбүтэ чахчы.
Вице-спикер Антонина Григорьева хапытаалынай өрөмүөн туһунан токкоолосто. Онуоха миниистир Александр Павлович хоруйдаабытынан, Ньурба Чаппандатыгар, Уус Алдан Мүрүтүгэр, Өлүөхүмэ Черепанихатыгар, Дьааҥы Бөтөҥкөһүгэр уо.д.а. уу ситимин, шлюз-регулятордары хапытаалынайдык өрөмүөннээһин ыытыллыаҕа. Дьокутааттар Сахаяна Павлова иһитиннэриитин кэнниттэн науканы кытта ыкса үлэлэһэргэ эттилэр. Ол курдук, Сунтаар Кириэстээҕэр подсолнух үрдүк үүнүүтэ ылыллыбыта ахтылынна.
Кэпсэтиини түмүктүүрүгэр норуот дьокутаата Андрей Находкин сүөһү аһылыгын бэлэмнээһин боппуруоһа хаһааҥҥытааҕар даҕаны сытыытык турарынан мелиорация үлэтин ыытыыны норуот дьокутааттара өйүөхпүт диэн эрэннэрдэ.
Бэлэмнээтэ Женни Стрюкова
Хаартыска: СИА архыыбыттан