Өйдүүргүт эбитэ дуу, биэс-алта сыллааҕыга диэри Туймаада ыһыаҕын кэмигэр суотабай сибээс хаачыстыбата лаппа мөлтөөн, түһүлгэҕэ да сылдьар киһиэхэ сатаан эрийэн тиийбэккэ, дьон бэйэ-бэйэлэрин сүтэрсэн кэбиһэллэрэ.
edersaas.ru
Туймаада ыһыаҕар икки күн устата сүүһүнэн тыһыынча киһи тоҕуоруһан, суотабай сибээс, интэриниэт ноҕуруускаланан, төлөпүөнүнэн кэпсэтии күчүмэҕэйдэрдээх буолааччы. Аҕыйах сылтан бэттэх, “МегаФон” хампаанньа Саха сиринээҕи салаата Үс Хатыҥҥа көһөрүллэ сылдьар тирэх станцияны илдьэн туруорар буолан, туһааннаах оператор абоненнара төлөпүөнүнэн кэпсэтиигэ улахан харгыстары көрсүбэт буоллулар.
Бу күннэргэ хампаанньа үлэһиттэрэ тирэх станцияны Үс Хатыҥҥа илдьэн туруордулар. Станцияны туруоруу үлэтигэр суруналыыстар эмиэ сырыттылар. Ол курдук, “КамАЗ” массыынаҕа баар станция Үс Хатыҥҥа ыһыах бүтүөр диэри туруоҕа.
“МегаФон” Саха сиринээҕи салаата номнуо тохсус сылын Туймаада ыһыаҕар кыттан, абоненнарын суотабай сибээһинэн хааччыйара хайҕаллаах. Дьон тоҕуоруһар сиригэр сибээс хаачыстыбата мөлтүүр түгэннэрэ баар суол. Көһө сылдьар тирэх станцияны туруоран, Үс Хатыҥҥа сибээһи күүһүрдэн, дьон төһө баҕарар, туох да харгыһа суох төлөпүөнүнэн кэпсэтэр буоллулар. Интэриниэт эмиэ этэҥҥэ үлэлиир.
Былырыыҥҥы ыһыах кэмигэр хампаанньа абоненнара интэриниэтинэн уопсайа 4 мөлүйүөн кэриҥэ хаартысканы ыыппыттара. Онон, «МегаФонынан» туһанааччылар бу сырыыга эмиэ Үс Хатыҥҥа хаачыстыбалаах сибээһинэн хааччыллар буоллулар.
edersaas.ru