Саха сирин ыччата үүнэригэр-сайдарыгар суолталаах икки тэрилтэ үлэҕэ киирдэ. Бу икки дьиэ силбэһэ тураллар. Кинилэри биир далаһа ситимниир.
edersaas.ru
СӨ бырабыыталыстыбатын бэрэссэдээтэлэ Владимир Солодов тыл этэригэр маны тоһоҕолоон бэлиэтээтэ: “Биир өттүттэн искусствоны, иккис өттүттэн интеллектуальнай сайдыыны, ааҕыыны ситимниирэ, тус бэйэм санаабар, мээнэҕэ буолбатах. Аныгы кэмҥэ муусукаҕа кырааматынас, муусука үстүрүмүөннэригэр сатаан оонньуур, муусуканы өйдүүр — аныгы араас өрүттээх олох, уопсастыба толору чилиэнэ буоларга биир сүрүн компетенция. Оттон смарт-бибилэтиэкэ информация үйэтигэр бибилэтиэкэ оруолун саҥа ыстандаартын олохтуур”, — диэн эттэ. Итиэннэ инникитин даҕаны судаарыстыбаннай-чааһынай бииргэ үлэлэһии барыан, инвестордарга, саҥа дьиэлэр дьэндэйэллэригэр кылааттарын киллэрсибит дьоҥҥо барыларыгар махтанарын биллэрдэ. Ытыс тыаһын ортотугар бибилэтиэкэҕэ уонна оскуолаҕа өйдөбүнньүк бэлэхтэри туттартаата.
Оттон Дьокуускай куорат мэрэ Сардаана Авксентьева үйэҕэ биирдэ бэлиэтэнэр түгэн диэн чорботто. Итиэннэ Ил Дархан Айсен Николаевка махталын тиэртэ, бу кини өйүгэ буоларын эттэ. Мантан Саха сирин ааттатар талааннаах оҕолор үүнэн тахсалларыгар эрэнэрин биллэрдэ уонна 100 тыһ. солк. суумалаах сэртипикээттэри туттартаата.
“Газэнергомонтаж” ХЭТ генеральнай дириэктэрэ Денис Некрасов бу балачча ураты архитектура, сэдэх тутуу буоларын ыйда. Оҕолорго айымньылаах үлэни, оттон преподавателлэргэ саҥа талааннары үүннэрэллэригэр баҕа санаатын тиэртэ.
Дьокуускай куорат кииннэммит бибилэтиэкэтин ситимин дириэктэрэ Мария Андреева иһитиннэрбитинэн, бу 1911 сыл кэнниттэн аан маҥнайгытын тутуллубут публичнай бибилэтиэкэ дьиэтэ буоларын эттэ. Аан дойду бибилэтиэкэтэ барыта биир сиргэ – электроннайга түмүллүөн эттэ, итиэннэ оҕотуттан оҕонньоругар тиийэ дьону барытын түмүөн, бастакы сылларга 6 тыһ. кэриҥэ киһини хабар былааннахтарын эттэ.
Дьокуускай куораттааҕы 2-с №-дээх Оҕо искусствотын оскуолатын дириэктэрэ Мария Кычкина иһитиннэрбитинэн, күн бүгүн сэттэ хайысханан 313 оҕо үөрэнэр, тустаах оскуола иһинэн 14 айар кэлэктиип үлэлиир эбит. Муусука бастакы оскуолата тэриллибитэ 75 сыллаах үбүлүөйүн көрсө саҥа дьиэ аһыллыбыта икки бүк үөрүүлээх диэн санаатын үллэһиннэ.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.