Бу этиини ааҕан баран элбэх дьон олус соһуйбут, сөхпүт буолуохтааххыт. Ол Мексикаҕа туох сыаллаах, тугу гына бардылар диэн ыйытыыга маннык хоруйдуубун.
edersaas.ru
Сунтаартан 24 киһилээх делегация, Дьокуускай куораттан «Эллэйаада» түмсүү Вильям Федоровы уонна талааннаах дьону кытта ситимнэһэн биир сыл устата бэлэмнэнэн Мексика сиригэр Саха төрүт култууратын көрдөрө-билиһиннэрэ, «Сибирь-Вальядолид: обмен двумя культурами» бырайыакка кытта кэллибит. Сыалбыт-сорукпут — Мексика сирин кытта ытык түһүлгэлэри сөргүтэр туһунан сөбүлэһии түһэрсии, саха аатын ааттата, үтүө үгэстэри, сиэри-туому, саха фольклорун атын омуктарга билиһиннэрии, саха түһүлгэтин төрүттээн Аар Баҕах сэргэни туруоруу.
Бэҕэһээ Сунтаар делегацията, ол иһигэр улуус баһылыгын солбуйааччы Гаврил Еремеев, култуура салайааччыта Мария Кобельянова, иистэнньэҥ, «Сунтаар ситимэ» түмсүү салайааччыта Антонина Кириллина, алгысчыт Кураһаай Мэхээлэ, «Саха» НКИХ Сунтаардааҕы салайааччыта Ольга Захарова, оператор-монтажер Вячеслав Борисов, Кириэстээхтэн Августина Платонова, «Одун» ансаамбыл салайааччыта Василий Васильев уонна Дьаархантан, Сунтаартан, Тойбохойтон, Кутанаттан, Бордоҥтон, Кириэстээхтэн 18 оҕо буолан, Дьокуускайтан — Москваҕа диэри 6 чаас, онтон Москваттан — Канкун куоракка диэри 12 чаас айаннаан, акыйаан үрдүнэн көтөн, Мексикаҕа этэҥҥэ айаннаан кэллибит. Бүгүн биһиги биир дойдулаахтарбыт Вильям Федоров, Юрий Ксенофонтов, Лука Егоров Дьокуускайтан кэлэн, Эдит Сото — «Новое человечество» түмсүү салайааччытын, учуонай тэрийээччилиин Вальядолид куоракка сэргэ уһана бардылар. Эдит Сото былырыын Сунтаарга ытык-мааны ыһыахпытыгар ыалдьыттаан итэҕэлбит чуо маарыҥнаһар, хатылаһар түгэннэрэ олус элбэхтэр диэн сөҕөн-махтайан барбыта, бу сырыыга аны биһигини ыҥыран, сир биэрэн, саха түһүлгэтин Мексикаҕа төрүттээн эрэбит. Бырайыак сэтинньи 30 күнүттэн — ахсынньы 4 күнүгэр диэри Вальядолид куоракка тэриллиэхтээх, манна биһиги ытык ыһыахпытын көрдөрүөхтээхпит, кыыс сүктүүтүн, күн көрсүүтүн сиэрин-туомун билиһиннэриэхтээхпит, саха култууратын быыстапкатын тэрийиэхтээхпит уонна сэргэбитин туруоруохтаахпыт. Бу тэрээһин кэмигэр Мексика саҥа бэрэсидьиэнэ сүрэхтэниэхтээх, манна биһиги дойдубут бэрэсидьиэнэ В.В.Путин кэлиэхтээх, сатаннаҕына, биһиги тэрээһиммитин көрүө-истиэ диэн эрэл кыыма баар. Биһиги сэргэбитин омуктар улахан суолталаах үс дойдуну ситимниир ытык мас курдук ылынан — дойдубутугар күүс-көмө буолуо диэн итэҕэллээхтэр. Билигин биһиги Канкун куоракка баарбыт. Биһигини бу дойдуга Үөһээ Бүлүү Хоротуттан төрүттээх Анфиса диэн саха кыыһа көрүстэ, онтон экскурсияҕа Абыйтан төрүттээх Татьяна Корякина сирдээн илдьэ сырытта. Кини кэпсээнинэн, өссө икки саха кыыһа баар диэн сөхтөрдө. Биһиги улахан бырааһынньыкпытыгар манна олохсуйбут сахалар бары кэлиэхтээхтэр. Биһигини кытта манна саха былааҕын ааптара Мэҥэ Хаҥаластан төрүттээх, Уус Алдан Далбар Хотуна Людмила Слепцова бииргэ сылдьара үрдүк үөрүү. Онон олус долгуйабыт.
Баҕар, айабыын, бу үлүгэрдээх киһи хантан үптэнэн барда диэтэххитинэ, бары кэриэтэ бэйэ үбүнэн кэллибит. Махталбын биллэрэбин төрөппүттэргэ, салайааччыга Василийга, аттыбар: «Биһигини уонна манна туох ытыран илдьэ барыай», — диэн түргэн үлүгэрдик хомунан, харчы булан кэлбит Кураһаайга, Ольга Захароваҕа, Августина Платоноваҕа, Антонина Кириллинаҕа. Култуура салалтата, «Эллэйаада» түмсүү кыттыһан быыстапка турарыгар үбүнэн, ону таһынан, оҕолор Москваҕа олорууларыгар о.д.а. кыра көмө барда. Кылгастык чэ, ити курдук… өссө сырдатыы барыа!
Мария Кобельянова-Тускулаана, edersaas.ru саайтка анаан