Бэлэхтэммит тюльпаннар, розалар уонна да атын сибэккилэр вазаҕа өр туруохтара, өскөтүн кинилэри сөпкө көрөр-харайар буоллахха. Сибэкки олоҕун уһатар туһугар дьиҥнээхтик көмөлөһөр ньымалары хомуйдубут. Саҥа сибэккилэр сүрүн өстөөхтөрө – бактериялар. Кинилэр үүнээйини сүһүрдэн, эрдэ хатан өлөрүн түргэтэтэллэр. Ыраас буолуу уонна сөптөөх аһатыы – сибэкки дьөрбөтүн өр турарын мэктиэтэ.
Ваза, эбэтэр сибэккини угар ханнык баҕарар иһит, ыраастык сууйуллубут, оттон онно кутуллар уу – тымныы буолуохтаах. Онуоха эбии, быhыллыбыт сибэккигэ аналлаах анал эбиликтэри тута кутан биэрэр ордук. Бу эбиликтэр сибэккини иҥэмтиэлээх эттиктэринэн хааччыйан эрэ баран тохтооботтор, уу аһыытын намтаталлар, ону таһынан бактериялар үөскүүллэрин мөлтөтөр эбиликтэрдээхтэр.
Бастатан тура, умнастан уу таһымыттан аллараа баар сэбирдэхтэри барытын ыраастыахха — быһан ылыахха наада. Оттон умнастарын бэйэтин сытыы быһаҕынан эбэтэр сибэккигэ аналлаах кыптыыйынан 45 кыраадыс туора быһабыт. Быспытын кэннэ сибэккилэри олус түргэнник – хас да сөкүүндэ иһигэр ууга угуллуохтаах. Атын түбэлтэҕэ умнас төбөтө бүөлэнэн, үүнээйи ууну иһэр кыаҕын сүтэриэ уонна түргэнник өлөр.
Сибэккини хайдах өр кэмҥэ тыыннаах туруорабыт?
- Вазаҕа баар ууну икки күҥҥэ бииртэн итэҕэһэ суох, оттон ордук – күн аайы уларытыахха наада. Бу кэмҥэ вазаны уонна сибэкки умнастарын сайҕаан биэрэр ордук. Сытыйан эрэр төбөлөрүн быһан, эбилик кутан баран, дьөрбөнү төттөрү ууруҥ.
- Сибэккилэри ититэр тэриллэртэн уонна күн уотун быһаччы тыгарыттан тэйиччи тутуохха наада. Ону таһынан, аттыгар фрукталар сыппаттарын хонтуруоллааҥ. Дьаабылака, банан, груша, абрикос этилен диэн гааһы таһаараллар, ол сибэкки дьөрбөтүн хатарын түргэтиэн сөп.
- Сибэккилэр сөрүүнү сөбүлүүллэр. Өскөтүн түүн вазаны халадьыылынньыкка уурдахха, оттон күнүс муус кубиктарын ууга эбэн биэрэр буоллаххына, кэрэ дьөрбө төһө өр турарыттан бэйэҥ бэркиһиэҕиҥ.
Тугу оҥорор сатамматый?
- Сорох дьон сибэккигэ аспирины ууга куталлар. Дьиҥэр, бу ньыма сибэкки өлөрүн түргэтэтэр эбит. Ол оннугар анал эбиликтэри туһаныҥ.
- Саахары сибэкки түргэнник арылларыгар уонна өр турарыгар көмөлөһөр диэн сүбэлииллэр. Ол эрээри, саахар ууга бактериялар түргэнник үөскүүллэригэр эрэ эйгэ буолар.