Социальнай ситимнэри биир гына тарҕаммыт уонна, дьиктитэ диэн, олус минньигэс амтаннаах десерт ырысыабын кытта үллэстэбит. Бу аһы йогурт кириэмнээх торду санатара сөхтөрөр.
Бэлэмнииргэ баара-суоҕа аҕыйах мүнүүтэ наада. Ол эрээри, десерт толору амтанын биэрэрин туһугар, халадьыылынньыкка кырата 3-4 чаас, оттон ордук буоллаҕына – түүнү быһа туруоруллуохтаах.
Биир кыра бааҥка греческэй йогурт ылыллар. Онно икки кыра ньуоска саахар уонна биир ньуоска уулларыллыбыт кофе (бороһуок) кутуллар. Барытын үчүгэйдик булкуйуллар. Булкуйуллубут маассаҕа бичиэнньэ уган биэрэбит. Үрдүн хаппахтаан, халадьыылынньыкка уурабыт. Кэлин таһааран, үрдүгэр какао кутан киэргэтэбит. Десерт бэлэм!
Өссө судургутук эмиэ оҥоруохха сөп. Йогуртка отон кутабыт (хара отон, уулаах отон), ол оннугар кофе кутуллубат. Саахар эрэ кутан, бичиэнньэни угабыт. Бүттэ! Кыратык турбутун кэннэ халадьыылынньыктан таһааран, бичиэнньэни йогурту кытта булкуйабыт. Кэрэ амтаннаах аһы боруобалааҥ. Какао оннугар корица эмиэ кутуохха сөп.
Боруобалааҥ! Минньигэстик аһааҥ!