Саха төрүт аһа — убаһа силиилээх уҥуоҕа (чоҥку) билигин эрэстэрээннэргэ улаханнык сыаналанар, дьон-сэргэ сөбүлээн сиир күндү бүлүүдэтигэр кубулуйда.
Үгэс буолбут аһы аныгылыы, өссө минньигэстик бэлэмниэххэ сөп. Бүгүн биһиги чоҥкуну духуопкаҕа буһарар ураты ырысыабы кытта үллэстэбит. Бүлүүдэ сүрүн кистэлэҥэ — сыта-сымара уонна туспа амтан биэрэр эбии астарга сытар.
Чоҥкуну буһарарга маннык бородуукталар наадалар:
Убаһа сототун уҥуоҕа (силиилээх чоҥку);
- Чосунуок;
- Эриэппэ луук;
- Розмарин;
- Ынах арыыта;
- Килиэп (эбэтэр багет).
Астанар ньымата:
Чоҥкуну ыраастыыбыт. Чосунуогу, луугу уонна розмарины бэлэмниибит. Бу ингредиеннэр уҥуох силиитин сыатын кытта холбоһон, ураты минньигэс амтаны биэрэллэр Чосунуокка кыратык ынах арыытын эбэбит. Эриэппэ луугу сымныар диэри пашот оҥорон бэлэмниибит. Чоҥкуну ити этиллибит тумалары кытта холбоон духуопкаҕа угабыт. Розмарин ураты сыты биэрэр, оттон чосунуоктаах ынах арыыта силиини өссө сымнаҕас оҥорор.
Бүлүүдэ хайаан да кыратык хатарыллыбыт килиэби кытта бэриллиэхтээх. Килиэби чоҥкуну кытта бииргэ духуопкаҕа эбэтэр хобордооххо буһаран ылабыт. Манна сүрүнэ — килиэп чоҥку сытын уонна амтанын бэйэтигэр иҥэриниэхтээх.
Маннык оҥоһуллубут чоҥку олус тотоойу, иҥэмтэлээх уонна минньигэс буолар. Сахалыы аһы аныгылыы көрүүлээн, дьиэ кэргэҥҥитин, ыалдьыттаргытын күндүлээҥ. Минньигэстик аһааҥ!