Күннээҕи түбүккэ сылдьан, сороҕор дьиэ кэргэммитин, чугас дьоммутун минньигэстик аһатыахпытын баҕарабыт, ол эрээри бириэмэ тиийбэт. Үлэ-үөрэх кэнниттэн сылайан кэлэн, плита аттыгар уһуннук туруох санаа кэлбэтэ биллэр. Ол иһин «Эдэр саас» эһиэхэ маҕаһыынтан чэпчэки сыанаҕа ылыллар боростуой астарынан оҥоһуллар, ол эрээри олус тотоойу уонна минньигэс үс ырсыабы бэлэмнээтэ.
Бу бүлүүдэлэри астыырга эйиэхэ улахан уопут наадата суо
Хортуоппуйдаах запеканка
Саха киһитэ этэ суох сатаммат. Бу бүлүүдэ олус тотоойу, оҕо-аймах да, улахан да дьон сөбүлээн сииллэр. Сүрүнэ — барыта биир иһит иһигэр буһар.
Туох нааданый:
- Эт фарша (сүөһү эбэтэр сибиинньэ этэ) – 500 г
- Хортуоппуй – 6-7 устуука
- Луук – 1 устуука
- Сүөгэй эбэтэр майонез – 3-4 ньуоска
- Сыыр (баҕардахха) – 100 г
- Туус, биэрэс.
Хайдах астыыбыт:
1. Хортуоппуйу ыраастаан баран, синньигэс төгүрүк гына кырбааҥ (слайсы). 2. Фаршка кырбаммыт луугу, тууһу, биэрэһи эбэн буккуй. 3. Духуопканы 180 кыраадыска диэри итит. 4. Арыылаах формаҕа бастаан хортуоппуй аҥаарын тэлгэт, үрдүгэр туустаа. Онтон фаршкытын тэҥнээн ууруҥ. Үрдүгэр хаалбыт хортуоппуйгун уураҕыҥ. 5. Сүөгэйи (майонезы) кыра ууну кытта буккуйан баран үрдүгэр кут. 6. Духуопкаҕа 40-50 мүнүүтэ угабыт. Буһуон 10 мүнүүтэ иннинэ теркаламмыт сыыры үрдүгэр кутуохха сөп.
Сүөгэй соустаах куурусса
Түргэнник буһар уонна сымнаҕас эт. Гарнирга ириис курууппа, макарон эбэтэр гречка барсар.
Туох нааданый:
- Куурусса түөһүн этэ (филе) – 500 г
- Луук – 1 устуука
- Сүөгэй – 200 г
- Чосунуок – 2 тиис.
- Үүнээйи арыыта, туус, тума.
Хайдах астыыбыт:
1. Куурусса этин дьоҕус кубик гына кырбаа. 2. Хорбдооххо арыыны ититэн баран, этин маҥхайыар диэри ыһаарылааҥ (3-4 мүнүүтэ). 3. Кырбаммыт луугу эбэн, өссө 3 мүнүүтэ курдук луук сымныар диэри ыһаарылааҥ. 4. Сүөгэйи, эриллибит чосунуогу, тууһу уонна туманы эбэн буккуй. Өскөтүн соуһуҥ хойуу буоллаҕына, кыра уута эбэн биэр. 5. Хаппаҕын сабан баран, бытаан уокка 10-15 мүнүүтэ оргут. Бүттэ!
5 мүнүүтэлээх «Манник»
Манник — саамай судургу бөрүөк.
Туох нааданый:
- Маннай курууппа – 1 ыстакаан
- Суорат – 1 ыстакаан
- Саахар – 1 ыстакаан (эбэтэр аҕыйах)
- Бурдук – 1 ыстакаан
- Сымыыт – 2 устуука
- Сода – 0.5 ч.ньуоска.
Хайдах астыыбыт:
1. Иһиккэ маннай курууппаны уонна суораты буккуйан баран, курууппата үллүөр диэри 15-20 мүнүүтэ туруор (бириэмэ суох буоллаҕына тута да астыахха сөп, ол эрэн турдаҕына ордук). 2. Сымыыты саахары кытта булкуй, онтон суоракка кут. 3. Бурдугу уонна соданы эбэн үчүгэйдик буккуй. 4. Арыылаах формаҕа кутан баран, 180 кыраадыска 30-35 мүнүүтэ буһарабыт.
Минньигэстик аһааҥ!