Хас киһи баар да, соччо борщ астыыр ньымата баар! Бүгүн биһиги ааҕааччыларбыт ыыппыт ураты ырысыаптарын кытта үллэстэбит. Сүбүөкүлэ, хаппыыста, помидор, хортуоппуй. Оттон килька эбэтэр брокколи диэтэххэ хайдах истэҕитий? Борщ саамай дьикти ырысыаптарыгар ити курдук ураты сүбэлэр киирдилэр.
Фасоллаах борщ
Биир дьиэ хаһаайката дьиэ кэргэнин фасоллаах борщунан үөрдэрин олус сөбүлүүрүн туһунан кэпсээтэ. Бу ас хойуу уонна тотоойу буоларыгар көмөлөһөр. Фасолу хортуоппуйу кытта тэҥҥэ эбэтэр фасоль оннугар кутуохха сөп. Бааҥкаттан бэлэм кэнсирэбэлэммит кыһыл фасоль туттуллар. Фасолу миин буһарын саҕана эбэргэ сүбэлииллэр.
Килькалаах борщ
Ас-үөл эйгэтигэр 10-ча сыл үлэлиир идэтийбит пуобар, борщ саамай дьикти ырысыабын туһунан ыйытыыга килькалаах борщу, эбэтэр «балыктаах борщу» ааттаата. Ону астыырга балык кэнсиэрбэтэ туттуллар: томаттаах килька биир бааҥката сөп буолар. Ас көннөрү борщ курдук (оҕуруот аһын миинигэр) бэлэмнэнэр. Ол эрээри, бүтэһигэр ыһаарыыламмыт биир бааҥка килька эбиллэр.
Хортуоппуй пюрелаах борщ
Биир дьиэ хаһаайката эбэтэ үөрэппит борщ ырысыабын кытта үллэһиннэ. Кистэлэҥэ хортуоппуйу пюре кэриэтэ оҥорууга сытар. Ол инниттэн көстүрүүлэҕэ хортуоппуйу бүтүннүү угуллар. Хортуоппуй буһуор диэри буһарабыт, ол кэннэ хостоон ылан, мэлийэн баран, төттөрү көстүрүүлэҕэ кутабыт. Ону таһынан, аска тууһаммыт оҕурсу уутун эбэргэ сүбэлииллэр.
Брокколилаах борщ
Борщка үрүҥ хаппыыстаны брокколинан солбуйуохха сөп. Бу түгэҥҥэ хаппыыста амтана ордук сымнаҕас буолар. Брокколины көстүрүүлэҕэ быраҕыах иннинэ, араарталыахха наада. Сиикэй оҕуруот аһын буһарыы бүтүөн 5 мүнүүтэ иннинэ эбэргэ сүбэлэнэр, онтон бэлэм борщу амтана тупсарын курдук туруора түһэн баран биэриэххэ наада.
Дьаабылакалаах борщ
Аска икки кыра аһыы дьаабылаканы эптэххэ, борщ сөптөөх амтаны ылынар. Астыырга минньигэс помидор туттуллар түгэнигэр, бу фрукта көмөтүнэн борщка кыра аһыытыҥы амтаны биэриэххэ сөп. Ону таһынан, борщу аһыы оҥорорго тууһаммыт хаппыыста, уксуус, лимон эбэтэр лимон кислотата көмөлөһүө.