Ржевкэ Сэбиэскэй саллаакка өйдөбүнньүк аһылынна

Ааптар: 
Бөлөххө киир:

 Тверскэй уобалас Ржев куоратыгар Сэбиэскэй саллаакка анаммыт өйдөбүнньүк аһылынна.

edersaas.ru

ТАСС иһитиннэрбитинэн, суолталаах тэрээһиҥҥэ РФ Бэрэсидьиэнэ Владимир Путин уонна Беларуссия Өрөспүүбүлүкэтин Бэрэсидьиэнэ Александр Лукашенко кыттыыны ыллылар.

Судаарыстыбалар баһылыктара 1942–1943  сылларга Ржев анныгар улахан хаан тохтуулаах кыргыһыыга өлбүт Ийэ дойдуларын иһин тыыннарын толук уурбут буойуннары кэриэстээн, чуумпуран туран баран, өйдөбүнньүккэ венок уонна сибэкки дьөрбөтүн уурдулар.

Ржевтээҕи өйдөбүнньүк муус устарга аһыллыахтааҕа. Ол эрээри сысытыганнаах дьаҥ туран, суолталаах тэрээһини тохтотон, атын кэмҥэ көһөрөн биэрбиттэрэ. Бүгүн бэтэрээннэр уонна бочуоттаах караул санитарнай ирдэбили тутуһан, өйдөбүнньүк аһылынна.

Өйдөбүнньүк тутуутун Аҕа дойду сэриитин бэтэрээннэрэ көҕүлээбиттэрэ. Кинилэр Улуу Кыайыы 75 сылыгар  бэйэлэрин бойобуой табаарыстарын кэриэстээн бу улахан тутууну туруорсубуттара.

Норуоттар икки ардыларынааҕы аһаҕас куонкуруска  скульптор Андрей Коробцов уонна  архитектор Константин Фомин  бырайыактара кыайбыта. 25 миэтэрэлээх сэбиэскэй саллаат боруонса  пааматынньыга  10 миэтэрэ үрдүктээх мырааҥҥа турда.

Дойду баһылыга  Владимир Путин тыл этэригэр Ржев анныгар буолбут хааннаах сэрии хас да ый устата барбытын, манна хас биирдии миэтэрэ сир, дабаан, мыраан иһин кытаанах кыргыһыы буолбутун бэлиэтээтэ.

Ржев өйдөбүнньүгэ— Европаны нацизмтан быыһаабыт «дьоруой-саллаат, кыайыыллаах-саллаат, быыһааччы-саллаат» бэлиэ өйдөбүнньүгүнэн буолар. Манна мөлүйүөн үс сүүс тыһыынча киһи олоҕун толук уурбута, бааһырбыта, сураҕа суох сүппүтэ. Сэбиэскэй саллаат бу уоттаах кыргыһыыга өстөөххө Москваҕа суоһурҕаныы кыаллыа суоҕун көрдөрбүтэ. Ийэ дойдуга бэринии диэн хайдахтаах курдук күүстээҕин холобурдаабыта, — диэтэ Владимир Путин.

Белоруссия Бэрэсидьиэнэ Александр Лукашенко  Ржевтээҕи кыргыһыыга сэбиэскэй саллаат өстөөҕү  дойду тэбэр сүрэҕэ Москваҕа киллэрбэт инниттэн хорсуннук сэриилэспитин бэлиэтээн эттэ: «Биһиги бүгүн Сэбиэскэй Сойуус норуоттарын бары бэрэстэбииллэрэ кыттыбыт уоттаах сэрии буойуннарын кэриэстээн, бу өйдөбүнньүгү аһабыт. Маннык өйдөбүнньүктэр тутулла турдахтарына эрэ, Сэбиэскэй саллаат умнуллуо суоҕа,—диэн бэлиэтээтэ Александр Лукашенко.

Ржевтээҕи Монумент федеральнай бүддьүөттэн үп көрүллүбэккэ тутулунна. Бу — Норуот тутуута. Арассыыйа бары куораттарыттан,  Белоруссия уонна Казахстан Өрөспүүбүлүкэлэриттэн аҕаларын уонна эһэлэрин ааттаан туран, икки сыл устата дьон өйдөбүнньүгү  тутууга  көхтөөх кыттыыны ылла.

Елена ПОТОЦКАЯ, «Саха сирэ» хаһыат, edersaas.ru

Хаартыска — Сергей Бобылев / ТАСС

+1
0
+1
0
+1
0
+1
0
+1
0
+1
0
+1
0