Саха тыйаатырын сүрүн режиссера Руслан Тараховскай «Кытыл» диэн киинэ таһаараары сылдьар. Киинэни 2015 сыл сайыныгар хаҥалас улууһун Тумул уонна Тиит-Арыы сэлиэнньэлэригэр үс нэдиэлэ устубуттар. Сүрүн оруолларга Руслан бэйэтэ, Ирина Михайлова, Татьяна Легантьева, Геннадий Турантаев, Дьулустаан Софронов Лена Маркова, Мичил Березкин, Дмитрий Татаринов оонньоотулар. Киинэ оруолларын Саха, Олоҥхо, Үүнэр тыйаатырдар уонна Саха сиринээҕи циркэ артыыстара толордулар. Оператор Джур Березкин, продюсердар Алибек Молоров, Мария Турантаева буолан үлэлээтилэр.
Ким эмит үрдүү, сайда сатаатаҕына, ону өйдөөбөт, төттөрү төлкөлүү сатыыр дьон олоххо баар. Ол курдук, «Кытыл» киинэҕэ эмиэ бу маннык хартыына көстөр. Сүрүн дьоруой Эрхаан оҕо сааһа ааспыт түөлбэтигэр төннөргө сананар. Бары кыаҕынан төрөөбүт сирин сайыннарарга турунар. Ол эрээри киниэхэ утары санаалаах дьон мэһэйдэһэр. Эрхаан ураты сахалыы өйдөөх-санаалаах буолан сэлиэнньэтин дьонун быыһыыр толкуйу тобулар.
«Киинэбит жанрынан мелодрама буолар. Манна сүрүн ис хоһоон үс тиэмэни таарыйар – итэҕэл, эрэл уонна таптал. Төрөөбүт дойдутуттан тэйбит уол кэлэн, дьону кытта алтыһарын, санааларын уларытарын туһунан кииинэ буолан таҕыста. Биһиги, режиссердар, дьон үрүҥү-хараны арааралларын туһугар үлэлиэхтээхпит. Улахан бүддьүөтэ суох уһулунна. Бастаан киинэни Дьокуускай куорат тыйаатырдарыгар сүрэхтиэхпит, онтон улуустарынан көрдөрө айанныахпыт», – диэн киинэ режиссера Руслан Тараховскай санаатын үллэстэр. «Сүрүн оруолу Руслан бэйэтэ толордо. Дьиҥэр, Дмитрий Татаринов оонньуохтаах этэ. Хас биирдии артыыска амплуа диэн баар. Бүтэһиккэ диэри толкуйдаан баран, Дмитрий бу оруолга барсыбат эбит диэн быһаарбыппыт», – диир артыыс Лена Маркова.
Бу нэдиэлэ саҕаланыыта суруналыыстарга анаан «Кытыл» киинэ сүрэхтэниитэ буолан ааста. Манна бэлиэтээбиппинэн, сонун хаамыылаах, дириҥ ис хоһоонноох киинэ буолан тахсыбыт. Руслан Тараховскай режиссер уонна артыыс быһыытынан киинэҕэ уопутун сыаналыыргытыгар, саҥа киинэни көрөргүтүгэр ыҥырабыт!