Руслан Федотов: «Ил Дархан социальнай харалтаҕа улахан болҕомтону уурарга эппитин саамай сөптөөҕүнэн ааҕабын»

Ааптар: 
Бөлөххө киир:

Норуот дьокутаата, урбаанньыт Руслан Федотов Ил Дархан Айсен Николаев Анал этиитин туһунан санаатын үллэстэр:

– Быйылгы туһаайыы олох бары эйгэтин хабан, өрөспүүбүлүкэ социальнай-экэнэмиичэскэй көрдөрүүлэринэн инники күөҥҥэ тахсар кыаҕын ситиһэргэ туһуламмыт. Айсен Сергеевич Саха сирин олохтоохторо көрсөр кыһалҕаларын арылхайдык быһаарда уонна аһаҕастык кэпсээтэ. Ол курдук, хамсыгынан сибээстээн бытархай тэрилтэлэр сабыллар турукка киирбиттэрин, оннооҕор бөдөҥ тэрилтэлэр оҥорон таһаарыылара лаппа намтаабытын бэлиэтээтэ. Ол да иһин, Саха сирин хас 11-с олохтооҕо үлэтэ суох босуобуйатын ыларга күһэлиннэҕэ. Онон эһиил социальнай харалтаҕа улахан болҕомтону уурарга эппитин саамай сөптөөҕүнэн ааҕабын.

Атыыланар дьиэ сыаната олус үрдээбитин этэн туран, сыананы намтатар туһуттан дьиэни тутуу тэтимириэхтээҕин тоһоҕолоон бэлиэтээтэ. Территория биир кэлим сайдар бырайыактарын олоххо киллэрэргэ болҕомтону уурарга ыҥырда. Эһиил гаас ситимигэр нэһилиэнньэлээх пууннары, биирдиилээн ыаллары холбооһун иэнин кэҥэтэргэ сорук туруорда. Олохтоох оҥорон таһаарааччылары өйүүргэ сонун хайысхалар олоххо киириэхтэрэ диэтэ. Ол курдук, бырамыысалыннаһы сайыннарыы пуондатыттан чэпчэки, ювелирнай уонна ойуур бырамыысалыннаһын өйүүргэ эһиил 100 мөл. солк. биэрэргэ диэбитин биһирии иһиттим.

Ил Дархан туһаайыытыгар үүнэр сылга тыа хаһаайыстыбатыгар хаһааҥҥытааҕар даҕаны үгүөрү үп – 12,5 млрд солк. көрүллүбүтүн чопчу бэлиэтээтэ. Кэнники уон сылга ынах сүөһү ахсаана аан бастакытын 3,4% үрдээтэ. Эһиилгиттэн социальнай хантараактары үбүлээһини 600 мөл. солк., кэтэх хаһаайыстыбаны сайыннарарга көмөнү 200 тыһ. солк. диэри улаатыннарарга диэн этиитэ тыа дьонугар улахан көмө буолуоҕа. Тыа хаһаайыстыбатын аныгы тиэхиньикэтин, ол иһигэр лизинг мэхэньиисимин туһанан атыылаһыы бэрээдэктэниэхтээх диэн эттэ. Ил Дархан туһаайыыта эһиилги сылга эрэли саҕар, олук буолар.

Хаартыска — СИА.

+1
0
+1
0
+1
0
+1
0
+1
0
+1
0
+1
0