«Бастыҥ урбаанньыт» — Руслан Федотов

Ааптар: 
05.03.2018
Бөлөххө киир:

«Саха сирин киэҥ туттуута» норуот бириэмийэтин чэрчитинэн «Урбаанньыт» номинацияҕа Амма улууһуттан төрүттээх тыа хаһаайыстыбатын тиэхиникэтин, тутуу матырыйаалын уонна дьиэҕэ туттуллар малы атылыыр Руслан Федотов кыайда. Кулун тутар 2 күнүгэр кыайыылааҕы эҕэрдэлии министиэристибэлэр уонна биэдэмистибэлэр үлэһиттэрэ, биир дойдулаахтара уонна аймахтара кэллилэр.

Руслан Еремеевич Федотов Амма улууһун Лээги бөһүөлэгэр күн сирин көрбүтэ. Инженер идэлээх. 1998 сыллаахтан урбаанынан дьарыгырбыта. 17 сыл үлэлээн, Өрөспүүбүлүкэ биир бастыҥ урбаанньыта буолбута. Руслан Еремеевич спортивнай күрэхтэһиилэри спонсордыыр, оройуоннары тупсарыыга үлэлэһэр, саҕалаан эрэр урбаанньыттарга көмлөһөр, биир оҕо дьиэтин уонна 5 оскуоланы хааччыйар.

Кыайыылаахха наҕарааданы «Сахамедиа» холдинг генеральнай дириэктэрин солбуйааччы Афанасий Ноев туттарда. «Быйыл Арассыыйаҕа доброволец уонна волонтер сыла биллэриллибитэ. Руслан Еремеевич норуот бириэмийэтин кыайбыта мээнэ буолбатах. Кини үлэтин тухары элбэх дьоҥҥо көмөлөспүтэ»,- диэн бэлиэтээтэ.

Антон Сафронов, Саха Өрөспүүбүлүкэтин урбааҥҥа уонна инновационнай сайдыыга миниистирэ:

Руслан Еремеевич биһиги сайдарбытыгар маҥнайгы үктэли оҥорбута. Кинини холобур оҥостон элбэх киһи урбаанынан дьарыгырбыта уонна бэйэтин дьыалаларыгар ситиһиилээхтэр.

Роман Мандзяк, Саха Өрөспүбүлүкэтин Ил Дарханын уонна бырабыыталыстыбатын администрациятын инновационнай бэлиитикэҕэ департаменын салайааччыта:

Руслан Федотов уопута эдэр көлүөнэҕэ үөрэх быһыытанан бэриллэн иһиэхтээх.

Амма улууһун землячествотын бэрэссэдээтэлэ Александр Неустроев бэлиэтээбитинэн, Руслан Федотов дьиҥнээх филантроп: «Дьон-сэргэ кинини урбаанньыт эрэ быһыытынан билбэт. Кини өрөспүүбүлүкэҕэ биллэр меценат. Дьон көмө көрдөөтөҕүнэ кини хаһан да аккаастабат. Кини дьиҥнээх патриот». 

«Урбаанньыт» номинация кыайыылааҕа Руслан Федотов бэйэтэ этэринэн, кини 20 сыл анараа өттүгэр урбаанынан дьарыктанан саҕалыырын саҕана, урбаанньыт ааттаах-суоллаах идэ буолбатах этэ диир: «Баччааҥҥа диэри биһиги норуоппут туһугар үлэлээн-хамнаан кэллибит. Урбаанньыт идэтин үтүө өттүттэн көрдөрдүбүт. «Сахамедиа» онно холобур буолар. Билигин урбаанньыт идэтэ тэрилтэ салайааччыта, быраас уонна учуонай идэлэри кытта кэккэлэһэ турар. «Сахамедиа» холдиҥҥа, Саха Өрөспүүбүлүкэтин олохтоохторугар уонна Арассыыйа иһигэр уонна таһыгар бииргэ үлэлэһэр дьоммор махталбын тиэрдэбин.»  

Санатан эттэххэ, олунньуга Саха сирин олохтоохторо «Саха сирин киэҥ туттуута» норуот бириэмийэтин чэрчитинэн ыытыллыбыт «Урбаанньыт» номинация кыайыылааҕын куоластаан быһаардылар. Уопсайа 21 оройуонтан 30 хандьыдаат кыттыыны ылла. Куоластааһын түмүгүнэн, 5716 куолаһы ылан Руслан Федотов кыайыылааҕынан тахсыбыта.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0