Румянцев дьыалата: эмсэҕэлээччилэр сууттанааччыны көҥүлгэ хаалларарга көрдөһөллөр

Ааптар: 
Бөлөххө киир:

Биһиги сайтпыт эрдэ иһитиннэрбитин курдук, 2018 сыл сэтинньи 30 күнүттэн Дьокуускай куорат федеральнай суутугар Ил Түмэн урукку дьокутаата Николай Румянцев дьыалатын көрүү саҕаламмыта. Бэҕэһээ, ыам ыйын 20 күнүгэр, өрүттэр киирсиилэрэ (прения) түмүктэннэ. Ол эбэтэр, бу дьыаланы суут силиэстийэлээн бүтэрдэ. Бүгүн, ыам ыйын 21 күнүгэр, сууттанааччы Николай Румянцевка бүтэһик тыл бэриллэр. Сарсын, ыам ыйын 22 күнүгэр, бириигэбэр тахсар. 

edersaas.ru

Бу иннинэ, ыам ыйын 7 күнүгэр буолбут суут мунньаҕар, эмсэҕэлээччилэр, сууттанааччы, адвокаттар «өрүттэр эйэлэспиттэринэн, дьыаланы сабарга» диэн хадатаайыстыбаны үһүс төгүлүн киллэрбиттэрин, суут эмиэ өйөөбөтөҕө.

Оттон судаарыстыбаннай буруйдааччы (борокуруор) буруйдааһынын түмүктүүрүгэр, Николай Румянцевы 4 сыл 6 ыйга көс-холуонньаҕа көҥүлүн уонна үс сылга массыына ыытар быраабын быһарга туруорсубута.

Бэҕэһээҥҥи суут мунньаҕар Румянцев медосмотр барарынан, дьыаланы көрүүнү көһөрөргө хадатаайыстыба киллэрбитин, суут өйөөбөтө. Онон, суут мунньаҕа салҕанан барда.

Эмсэҕэлээччилэр адвокаттара Андреев Николай Румянцев хара маҥнайгыттан оҥорбутун толору билинэн, эмсэҕэлээччилэргэ материальнай уонна моральнай хоромньуну барытын төлөөбүтүн, ону ааһан, билигин да көмөлөһө сылдьарын, инникитин да көмөлөһөр санаалааҕын бэлиэтээн туран, суут кинини көҥүлүн быспатыгар көрдөстө.

Суол быһылаанын түмүгэр өлбүт Луис Сивцев огдообото Антонина Сивцева чочумча саҥата суох тура түһэн баран, уйадыйан ыла-ыла, маннык диэн эттэ: «Олох салҕанан барар, өлбүтү төнүннэрбэккин… оттон мин үс оҕобун атахтарыгар туруоруохпун наада, саамай кырам 4 эрэ саастаах … Биллэн турар, маннык быһаарыыны олус ыараханнык, күн аайы сыта-тура толкуйдаан баран ылыммытым. Чугас дьоммун кытары хаста эмэтэ ырытыһан-сүбэлэһэн баран. Уонна бүгүҥҥү күҥҥэ оҕолорум тустарыгар саамай сөптөөх быһаарыы дии саныыбын: эр киһи быһаарар кыһалҕаларын мин дьахтар быһыытынан кыайан быһаарар кыаҕым суох, оттон Николай Иннокентьевич сүрдээҕин көмөлөспүтэ даҕаны, көҥүлгэ хааллаҕына, салгыы көмөлөһүө даҕаны, онон, көҥүлүн быспаккытыгар көрдөһөбүн».

Сууттанааччы интэриэһин көмүскүүр үс адвокат (Михайлов, Гончар, Филатов) үһүөн Румянцев урут сууттана, холуобунай эппиэккэ тардылла сылдьыбатаҕын, быһылаан буолаатын, Ил Түмэн дьокутаатын мандатыттан бэйэтэ аккаастаммытын, эмсэҕэлээччилэртэн бырастыы гыналларыгар көрдөспүтүн, көмөлөһөрүн, суол быһылаанын кэнниттэн ол сиргэ оптуобус тохтобулун көһөттөрбүтүн, суолу сырдатар банаардары туруортарбытын бэлиэтээтилэр. Уонна Румянцев ол күн итирик айаннаабатаҕын, ханньаах арыгыны суол быһылаанын кэнниттэн стресс ылан испитин, чааска 50-60 км буолбакка, 40 км айаннаан испитин итиэннэ саахал эмсэҕэлээччилэр көрдөрбүттэрин курдук, суол кытыытыгар буолбакка, суолга буолбутун кэккэ туоһулар көрдөрбүттэрин этэн туран, Румянцев дьайыыларыгар буруйу оҥоруу састааба суоҕунан, быыһыыр бириигэбэр таһаарарга көрдөстүлэр.

Сууттанааччы Николай Румянцев олус долгуйан, быыһыгар абаран да туран, маннык диэн эттэ (кылгатан сүрүнүн биэрэбин — В.М.): «Мин эппиэтинэстэн куотуммаппын — суолга турар дьону тэбистэрэн, алдьархайы оҥорбутум. Оҥорбуппар эрэ эппиэттииргэ, накаастабалы сүгэргэ бэлэммин. Миэхэ сүрүнэ — эмсэҕэлээччилэр миигин бырастыы гыммыттара, ол аата таҥара да бырастыы гыныаҕа. Ити күн уруулга итирик олорботоҕум, тоҕо диэтэр, сарсыныгар начальнай оскуолаҕа оҕолору кытта көрсүһүүгэ барыахтаах этим уонна хайаан оҕолорго арыгы сыттаах тиийиэхпиний! Мин буруйбунан икки киһи өллө диэн санааттан, улахан стресс ылан, быһылаан кэнниттэн тута бэлэх илдьэн испит ханньаахпын испитим. Дьон миигиттэн, көннөрү киһиттэн, бөрөстүүпүнньүк оҥорбута санаабын олус баттыыр! Төһөлөөх элбэх киһиэхэ көмөлөспүтүм буолуой! Массыынам 3,5 т ыйааһыннаах, өскөтүн чааска 50-60 км айаннаан испитим буоллар, суол кытыытыгар туормастаабыт суолум-ииһим хаалыахтаах этэ, — оннук суол-иис суоҕун туоһу, ГИБДД иниспиэктэрэ Гермогенов көрдөрдө. Силиэстийэ хара маҥнайгыттан миигин буруйдуур тосхоллоох барбыта, суут силиэстийэтэ барытын ымпыктаан-чымпыктаан, дьиҥ хайдах баарынан быһаарыа диэн эрэммитим. Биир чахчыны этиэхпин баҕарбатаҕым да этэргэ күһэллэбин: «харчыга дьыаланы сабыахпыт» диэн этээччилэр баар буолбуттара — бу аата миигин бэриккэ тутаары гыммыттара дуу биитэр балаһыанньабынан туһанан, миигиттэн харчы ыла сатаабыттара дуу — аккаастаабытым. Бу да чахчы туоһулуур, мин буруйа суохпун.  Буруйу оҥоруу састааба суоҕунан, быыһыыр бириигэбэр таһаараргытыгар көрдөһөбүн».

Санатар буоллахха, аан бастакы иһитиннэриинэн, “Колми” автосалон генеральнай дириэктэрин солбуйааччы Николай Румянцев (суут мунньаҕар «солбуйааччыбын» диэбитэ) 2017 сыл балаҕан ыйын 7 күнүгэр Тулагы сэлиэнньэтин аттыгар киэһэ хараҥаҕа, күүстээх ардахха «Ниссан Патрол» массыынатынан итирик туруктаах айаннаан иһэн, үс киһини түҥнэри көппүтэ. Биир киһи сонно тута тыына быстыбыта, икки киһи эчэйии ылбыта.

Силиэстийэ уорганнара кинини РФ Холуобунай кодексатын 264- с ыст. 4-с чааһынан, ол эбэтэр, суол быраабылатын кэһэн, массыынаны итирик туруктаах ыытан, сэрэҕэ суохтан киһини өлүүгэ тиэрдиигэ буруйдаабыттара.

Бу дьыала туһунан сиһилии «Саха сирэ» хаһыат ыам ыйын 30 күнүнээҕи нүөмэригэр ааҕаарыҥ.

Вера Макарова, «Саха сирэ» хаһыат, edersaas.ru

Хаартыска: ааптар түһэриитэ.

+1
0
+1
0
+1
0
+1
0
+1
0
+1
0
+1
0