Саайтпытыгар бу дьыл сэтинньи 30 күнүгэр Дьокуускай куорат федеральнай суутугар Ил Түмэн урукку дьокутаата Николай Румянцев дьыалатын көрүү саҕаламмытын туһунан иһитиннэрбиппит. Дьыаланы судьуйа Анатолий Каратаев көрөр. Бэҕэһээ, ахсынньы 11 күнүгэр, дьыаланы салгыы көрдүлэр.
Суут судаарыстыбаннай буруйдааччы Саргылаана Холмогорова буруйдуур түмүгү ааҕыытыттан саҕаланна. Ааҕан бүппүтүн кэнниттэн судьуйа сууттанааччы Николай Румянцевтан «буруйгун билинэҕин дуо?» диэн ыйытыытыгар, Румянцев «сороҕун эрэ билинэбин, үлэбэр айаннаан испитим, мин арыгыны суол быһылаанын кэнниттэн испитим уонна кинилэр (эмсэҕэлээччилэри этэр — В.М) суол кытыытыгар турбатахтара, оннук эбитэ буоллар, массыынам кюветка түһүө этэ» диэн хоруйдаата.
Суут бэрээдэгин быһыытынан, бастакынан эмсэҕэлээччилэр — ити суол быһылааныгар суорума суолламмыт Луис Сивцев огдообото Антонина Сивцева уонна Владимир Федоров көрдөрүү биэрдилэр.
Эмсэҕэлээччи бэрэстэбиитэлин быһыытынан кыттар Антонина Сивцева ытамньыйа-ытамньыйа, борокуруор, адвокаттар ыйытыыларыгар хоруйдаан биэрбит көрдөрүүтүгэр, кини кэргэнинээн 16 сыл олорбуттарын, үс оҕолоохторун (16, 14, 4 саастаахтар), эрэ киһи да, кэргэн да быһыытынан үчүгэйин, олохторугар элбэҕи бииргэ ааспыттарын, кэргэнэ «Билмарт» атыы-эргиэн дьиэтигэр үлэлээбитин кэпсээтэ.
Сивцева көрдөрбүтүнэн, 2017 сыл балаҕан ыйын 7 күнүгэр кини оскуолаҕа төрөппүт мунньаҕар сылдьан, дьиэтигэр киэһэ 20.00 чаас ааһыыта кэлбит. Суол быһылаана буолбутун туһунан бастаан батсааптан билбит — оптуобус тохтобулугар массыына дьону түҥнэри көппүт диэн. Тута кини кэргэним туох эрэ буолбут быһыылаах диэн сүрэҕэр ыттарбыт. Онтон сотору буолан баран, киниэхэ эрийбиттэр — улахан уолунаан быһылаан буолбут сиригэр тиийбиттэрэ — кэргэнэ суол кытыытыгар сытар, номнуо тыына быстаахтаабыт эбит…
«Ол күн ардах түспүтэ, биһиги кэлбиппитигэр, дьону дьокутаат Румянцев түҥнэри көппүт, итирик үһү диэбиттэрэ, мин кинини ити иннинэ билбэт этим, массыына иһигэр олорор диэбиттэригэр, онно тиийэн массыына кэлин аанын аспытым — кини биир нуучча дьахтарын (адвокат Гончары этэр — В.М,.) кытта олороллоро, Румянцев «сыыһаны оҥордум» диэбитэ, массыына иһигэр арыгы сыта баарын-суоҕун өйдөөбөппүн, Румянцев итирик этэ», — диэн кэпсээтэ Антонина Сивцева.
Эмсэҕэлээччи Владимир Федоров көрдөрбүтүнэн, ол күн кини аймаҕа Афанасий Романовы уонна доҕоро Луис Сивцевы кытта үлэлээн бүтэн (үһүөн «Билмарт» үлэлээбиттэр — В.М.), Сыырдаахха бараары, оптуобус күүтэ туран, 0,5 лиитирэлээх биир бытыылка буокка ылан испиттэр. 20.00 чаас ааһыыта Сыырдаахха тиийэн, «Радиостанция» тохтобулга тахсыбыттар, ол кэмҥэ ардах наллаан түһэ турар эбит, кинилэр суолу туораан, үрдэ сабыылаах тохтобулга уонча мүнүүтэ олорон, кэпсэтэ түспүттэр. Онтон тарҕаһаары, суолу төттөрү туораары, суол кытыытыгар туран, бакаалаһан илии тутуспуттар… ол кэмҥэ куорат диэки өттүттэн хараҕы саатырдар сырдык фара уота тыгаатын, ханна да барбытын билбэккэ хаалбыт.
Сотору буолан баран, өйдөммүтэ — кини суол кытыытыгар сытар, Романов суол аллараатыгар сытар, Сивцев ханна баара көстүбэт эбит. Сивцевы көрдөөрү, тураары гыммыт да тута охтубут, иккистээн тураары гыммытыгар, ким эрэ кэлэн «турума» диэбит. Атаҕа тостубутун өйдөөбүт, онтон эмиэ өйүн сүтэрбит. Өрөспүүбүлүкэтээҕи балыыһаҕа икки ыйы быһа сыппыт, билигин да таһыттан сылдьан эмтэнэр эбит.
Эмсэҕэлээччилэр бу суут мунньаҕар адвокаттар ыйытыыларыгар хоруйдааһыннарынан, силиэстийэ бара турар кэмигэр Николай Румянцев кинилэргэ материальнай көмөнү оҥорбут: Сивцеваҕа 600 тыһ. солк. суумалаах кирэдьиитин төлөөбүт, бохоруонаҕа 50 тыһ. солк. биэрбит, сылаас гараас туруортарбыт; Федоровка 2018 сыл күһүнүгэр диэри харчынан да, эминэн да көмөлөспүт (бастаан Румянцев бэйэтин баҕатынан, онтон Сивцев эрийиитинэн), такситын төлүү сылдьыбыт, онтон Румянцев суоппара таспыт.
Суут аныгыскы мунньаҕа ахсынньы 17 күнүгэр буолар. Онно туоһулар көрдөрүү биэриэхтээхтэр.
Вера МАКАРОВА, «Саха сирэ» хаһыат, edersaas.ru
Ааптар хаартыскаҕа түһэриитэ.