Муус устар 13 күнүгэр “Русская Гуманитарная Миссия” чилиэннэрэ Луганскай норуодунай өрөспүүбүлүкэ Рубежнай куорат олохтоохторугар Саха сириттэн тиийбит гуманитарнай көмөнү тиэрдэн, түҥэттилэр.
Рубежнай куорат Луганскайтан 110 килэмиэтир тэйиччи баар, манна билигин элэктэриичистибэ, уунан хааччыйыы суох. ЛНР Норуодунай милииссийэтин управлениета иһитиннэрбитинэн, олохтоохтор бу көмө таһаҕас кэлэрин хаһааҥҥытааҕар да күүппүттэр.
Гуманитарнай көмөҕө саамай наадалаах табаардар, бородуукталар бааллар: бурдук, мокоруон, тушенка, куруппалар, чэй, саахар, туус, үүнээйи арыыта, эмп-томп, оҕо аһылыга, суунар-соттор тэриллэр…
“Манна уу да, уот да суох, гаас кэлиэ дуо? Аспытын кутаа оттон астанабыт. Мин икки саастаах оҕолоохпун, олус ыарахан. Оҕо аһылыгын, пюре, хааһы тутаммын, олус үөрдүм! Саха сирин олохтоохторугар махталбын тиэрдэбин!”, — диэн этэр эдэр ийэ Валерия.
“Мин ийэм ороҥҥо лип сытар, аһыыр аспыт суох. Маннык гуманитарнай көмө билигин биһиэхэ олус наадалаах”, — диир Рубежнай олохтооҕо Светлана Сидорова.
Бу гуманитарнай көмө Ил Дархан Айсен Николаев сорудаҕынан СӨ бырабыыталыстыбатын саппаас пуондатын үбүттэн атыылаһыллан хомуллубута. Муус устар 12 күнүгэр 7 туоннаттан тахса ыйааһыннаах таһаҕас Луганскай Өрөспүүбүлүкэтигэр тиэрдиллибитэ. Көмө сороҕун Луганскайга, сороҕун Рубежнайга түҥэппиттэрэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru