Атырдьах ыйын 13 күнүгэр Тэлэбиисэринэн көрдөрөр уонна араадьыйанан иһитиннэрэр Арассыыйатааҕы ситим (РТРС) тэриллибитэ 20 сылын бэлиэтиэҕэ. Тэрилтэ 2001 сыллаахха Арассыыйа Бэрэсидьиэнин 1031-с №-дээх ыйааҕынан баар буолбута.
Быйыл РТРС Арассыыйаҕа телекоммуникация салаатыгар бастыҥынан ааттанна.
2010-с сылларга РТРС тэлэбиисэринэн уонна араадьыйанан көрдөрөр-иһитиннэрэр аан дойдуга биир бастыҥ эфирнэй ситими олохтообута. Онон ситим 5040 ыстаансыйаны хабар уонна дойду олохтоохторугар 20 теле-ханаалы босхо көрдөрөр кыахтаах.
РТРС Саха сиринээҕи филиала 2003 сылтан Арассыыйатааҕы ситимҥэ киирбитэ. Билиҥҥитэ манна 191 киһи үлэлиир. Тэрилтэ теле-ситимэ 211 ыстаансыйанан өрөспүүбүлүкэ 95,33% олохтооҕор тэлэбиисэри көрдөрөр, араадьыйаны иһитиннэрэр. Федеральнай бырагыраамалары таһынан, эрэгийиэннээҕи «Саха» ГТРК, «Якутия 24» биэриилэрин «Россия 1», «Россия 2», «ОТР» ханаалларга көрдөрөр.
Арассыыйатааҕы ситим төрөөбүт күнүгэр, атырдьах ыйын 13 күнүгэр, Дьокуускайга, Биробиджаҥҥа, Благовещенскайга, Калининградка, Калугаҕа, Сочига, Челябинскайга уо.д.а. куораттарга телебашнялар бырааһынньыктааҕы уотунан-күөһүнэн сандаарыахтара. Оттон Останкино башняҕа биир суукка устата эҕэрдэ аккырыыкка, хампаанньа логотиптара көстүөхтэрэ.
СИА хаартыската.