2011 сылтан үһүс уонна онтон кэлэр оҕолоро төрөөбүт (иитэ ылбыт) ыалларга өрөспүүбүлүкэтээҕи Ийэ хапытаала төлөнөр. 2011-2021 сылларга барыта 32 322 сэртипикээт бэриллибит, 3,8 миллиард солкуобай суумалаах 34 356 төлөбүр оҥоһуллубут.
Ол иһигэр: саамай элбэхтик олорор дьиэ-уот усулуобуйатын тупсарыыга ыыппыттар – 19 408 төлөбүр (53,4%), тыраансыпары атыылаһыыга – 10 430 төлөбүр (28,7%), оҕону үөрэттэриигэ – 393, кэтэх хаһаайыстыбаны сайыннарыыга – 913, оҕо эмтэнэригэр – 12, о.д.а.
Ону тэҥэ, элбэх оҕолоох дьиэ кэргэттэргэ бэриллэр босхо сир учаастактан аккаастанар түгэннэригэр, өрөспүүбүлүкэтээҕи Ийэ хапытаалын суумата икки бүк эбиллэн бэриллэр. Маннык төлөбүрү (уопсай суумата 161,7 мөлүйүөн солкуобай) 682 дьиэ кэргэн ылан туһаммыт. Бу бырагыраама 2019 сылтан үлэлээн бүппүт, сир учаастагыттан 2018 сыл ахсынньы 31 күнүгэр диэри аккаастаммыт эрэ буоллахха, харчынан ылар быраап үөскүүр.
2022 сылга өрөспүүбүлүкэтээҕи Ийэ хапытаалын суумата – 144 467 солкуобай, икки бүк суумата – 279 433 солкуобай. Сыл аайы суумата индексацияланан, үрдүүр.
Сыл аайы өрөспүүбүлүкэтээҕи Ийэ хапытаалын сэртипикээтин 3-4-түү тыһыынча ыал ылар эбит, арай, 2020 сылга 2186 дьиэ кэргэн ылбыт.
Ангелина Васильева, “Саха сирэ” хаһыат, edersaas.ru