Билигин нэһилиэнньэни эминэн-томунан хааччыллыы уонна эмп-том саппааһа долгутар. Нэһилиэнньэни ордук долгутар ыйытыыларга СӨ Доруобуйа харыстабылын министиэристибэтин хардатын билиһиннэрэбит.
– Санкцияларынан сибээстээн, омук сириттэн эмтээх препараттары аҕалыы харгыстаныа дуо?
– Арассыыйа Доруобуйаҕа харыстабылын министиэристибэтэ иһитиннэрэринэн, кулун тутар 17 күнүнээҕи туругунан, омук сирдэриттн эми аҕалыыны хааччахтыыр туһунан сайабылыанньалар киирбэтилэр. Билигин Арассыыйаҕа омук эмтэрэ 40 % ылаллар. Үгүс эмтэри солбуйар эмтэр Арассыыйаҕа бааллар.
– Нэһилиэнньэ чэпчэтиилээх өҥөнөн туһанар араҥата хайдах хааччыллыай?
– Чэпчэтиилээх эминэн хааччыллыы уларыйыа суоҕа. 2022 сылга чэпчэтиилээх өҥөнэн хааччыллар быраптаах дьону эмтээх препараттарынан хааччыйарга 2 миллиард 632 мөлүйүөнтэн тахса үп көрүлүннэ. Өрөспүүбүлүкэ ыскылааттарыгар эмтээх препараттар саппаастарын сөптөөх кээмэйэ баар. Онтон эмтиир тэрилтэлэргэ үс ыйга тиийэр саппаастаахтар. Омук инсулинын оҥорооччулар Арассыыйаҕа тириэрдии-аҕалыы бобуллуо суоҕун, инсулин былааннаммыт эрэһииминэн аҕалылла туруоҕун туһунан иһитиннэрэллэр.
— Өрөспүүбүлүкэ улуустарыгар, ордук ыраах сытар, мөлтөх суоллаах-иистээх сирдэргэ, эми тириэрдии хайдах тэриллэрий?
– Өрөспүүбүлүкэ улуустарыгар эмтээх препараттары кэмигэр тириэрдэр туһугар СӨ Тырааныспарга министиэристибэтэ өрөспүүбүлүкэ ыраах сытар нэһилиэнньэлээх пууннарыгар таһаҕаһы (эмтээх сириэстибэлэри) тириэрдэргэ регламены бигэргэтэр туһунан бирикээс таһаарда. Бирикээс быһыытынан, «Якутия», «Полярнай авиалиниялар», «Дьокуускай аэропорда» көтөр хампаанньаларга Арктика уонна ыраах сытар улуустарга мэдиссиинискэй тэрилтэлэр уонна аптыакалар, «Сахафармация» АУо сакаастарынан, олоххо-дьаһахха тыын суолталаах эмтэри аҕалыыны хааччыйарга сорудахтанна.
— Аптыакаларга балаһыанньа хайдаҕый? Эминэн хааччыныы наада дуо?
– Билиҥҥи туругунан Дьокуускай куорат аптыакаларын ситимигэр дьон тоҕуоруһуутун таһаарар уочараттар суохтар. Аптыакалар бэйэлэрин, ол иһигэр, интэриниэт-аптыакалар эрэһиимнэринэн үлэлииллэр. Олоҕо суох сүпсүлгэнинэн, ол эбэтэр атыылаһааччылар наһаа элбэх эми ыла сатыылларынан сибээстээн, сорох эмтэргэ харгытааһын тахсан ылар. Онуоха эмтээх препараттар үгүстэрэ тутуһуллар болдьохтоохторун, сорох эмтэри харайыы тустаах усулуобуйаны ирдииллэрин өйдүөххэ наада.
Надежда ЕГОРОВА, «Саха сирэ», edersaas.ru