Алтынньы 27-29 күннэригэр Дьокуускай куоракка бүтүн Арассыыйатааҕы устудьуоннар этэрээттэрин слета буолан ааста. Уопсайа 2000-ттан тахса Арассыыйа араас этэрээттэриттэн байыастар кыттыыны ыллылар. Кинилэртэн слет кэнниттэн санааларын, Дьокуускай куорат туһунан ыйыталастыбыт. edersaas.ru
Виталий Держановский, Беларуссияттан ыҥырыллан кэлбит бочуоттаах ыалдьыт:
— Устудьуоннар этэрээттэрин слеттарыгар бастакыбын кыттыыны ыллым. Бэйэм «Дети Немана» этэрээккэ үлэбин саҕалаабытым. Онтон 2017 сыллахха «БэлАЭС-2017» бүтүн Белоруссиятааҕы Атомнай электростанция тутуутугар 250 байыастаах этэрээккэ хамандыырдаабытым. Манна кэллэ-кэлээт үрдүк таһымнаах тэрээһиҥҥэ сылдьар чиэскэ тигистим диэн өйдөөбүтүм. Аэропортка олус үчүгэйдик көрсөннөр, сылаас санааны үөскэппиттэрэ. Биһиги делегациябыт биэс киһилээх. Бары слеттан астынныбыт. Аҥардас бырагырааматын бэлиэтиэхпин баҕарабын. Киһи интэриэһиргээбит лекциятыгар, дисскуссияҕа, маастар кылаастарга уонна Дьокуускай куорат устун экскурсияҕа бириэмэтин аттаран сылдьар гына оҥоһуллубут. Санаммыт тэрээһиммэр барытыгар сырыттым. Дойдубуттан 9200 км ыраах хаһан да сылдьа иликпин. Саха сирин айылҕата сөхтөрдө. Олус кыраһыабай айылҕалаах сиргэ олорор эбиккит. Саха норуотун аһылыгын барытын боруобалыы сатаатым. Буотарах миинэ, кымыс истим, сөбүлээтим. Сэлии муоһуттан араас оҥоһуктары сөхтүм. “Чочур Мыраан” комплекска ирбэт тоҥу көрөн сүргэм көтөҕүлүннэ.
Полина Дорофеева, Оренбург куорат «Ориентир» устудьуоннар педагогическэй этэрээттэрин байыаһа:
— Бүтүн Арасыыйатааҕы устудьуоннар этэрээттэрин слета олус үрдүк таһымнаахтык ааста. Элбэх саҥа доҕоттордоннум. Үөрэтэр былаһааккалар бэккэ табыллан үлэлээтилэр. Хас даҕаны лекцияҕа уонна дискуссияҕа сырыттым. Дьокуускай куорат, хата, томороон тымныыларынан көрсүбэтэ диэн үөрдүм. Ол иһин туох баар экскурсияҕа барытыгар сырыттым, тоҥмотум.
Ольга Зинченко, Череповец куорат судаарыстыбыннай университетын тутар этэрээттэрин штабын хамандыыра:
— Бастатан туран, тымныы сиргэ туохтааҕар да сылаастык көрсүбүттэрэ миигин наһаа үөртэ. Тыйыс — тымныы айылҕалаах Саха өрөспүүбүлүкэтигэр сылдьыахпын баҕарбытым ыраатта. Хата устудьуоннар этэрээттэрин слета манна буолан, баҕа санаам туолла. Слет тэрээһинэ олус үчүгэй. Бырагыраамата хас биирдии байыастарга табыгастаахтык оҥоһуллубут. Бириэмэбин үксүн айар бэстибээлгэ анаатым. “Чочур Мыраан” комплексы олус астынным. Ирбэт тоҥу илэ харахпынан көрөн олус үөрдүм.
Кирилл Мансеров, Архангельскй уобалас “Орбита” тутар этэрээт хамандыыра:
— “Академическай” диэн Арассыыйатааҕы тутууга үлэбин саҕалаабытым, быйыл “Поморье” тутар этэрээккэ үлэлээтим. Үлэбэр бастыҥ көрдөрүүлэрим иһин Дьокуускайга слекка кэлэн турабын. Саха сиригэр бастакыбын сылдьабын, “тымныы буолуоҕа” диэн сэрэппиттэрэ. Оҥостон аҕай кэлбитим, хата, соччо тоҥмотум. Мусуойдарга сырыттым, кымыс истим. Араас тутууга сылдьыбыт ыччаты кытта билсэн кэпсэтэн, санаа атастаһан, слет бүппүтүн билбэккэ даҕаны хааллым.
Ирина Тутвасева, Пермь куорат “Таурс” хаһаайыстыбаннай этэрээтин байыаһа:
— Пермь куоракка академияҕа бэтэринээр идэтигэр үөрэммитим иккис сыла буолла. Устудьуоннуу киирээт даҕаны тута этэрээккэ киирэр эбиппин диэн санаммытым. Кыылы олус сөбүлүүбүн, онон кыылы иитэр, көрөр-истэр этэрээккэ үлэлээн саҕалаабытым. Маннык хабааннаах улахан тэрээһиҥҥэ бастакыбын сырыттым. Спордунан дьарыктанар буоламмын, мас тардыһыыта буолбутун олус сэҥээрдим. Атын куорат байыастарын кытта билсэн, доҕордоһон олус астынным, кэлэр үлэ сезонун номнуо күүтэн эрэбин.
Айтана Аммосова, Николай Попов, edersaas.ru