Норуоттар икки ардыларынааҕы «Евровидение» ырыа күрэһэ Нидерланды Роттердам куоратыгар саҕаланна. Ньиве-Маас өрүс кытылыгар 39 дойдуттан 34 делегация кэллэ. Тэрээһин сүгүрүйээччилэригэр уонна суруналыыстарга анаан онлайн сырдатыллар.
Куонкуруска коронавируһунан сорох дойдулар сатаан кытта кэлбэтэхтэрин ыытааччылар иһитиннэрдилэр. Сабыылаах дойдулар кыттааччылара тэйиччиттэн кыттыахтарын сөп. Ол курдук, Австралия бэрэстэбиитэлэ Монтень хааччахтыыр миэрэлэринэн сатаан кэлбэтэх, ол оннугар видео-устуутун ыыппыт. Аны «Евровидение» арыллыытыгар анаалыстара «положительнай» буолбут Польша уонна Исландия делегациялара киирбэтилэр. Итиэннэ кинилэри кытта биир отельга түспүт Румыния уонна Мальта артыыстарын тэрийээччилэр бэйэни хааччахтааһыҥҥа ыыттылар.
Инньэ гынан куонкуруска Арассыыйа, Литва, Германия, Словения, Франция, Италия, Испания, Хотугу Македония, Нидерланды, Израиль, Великобритания, Швеция, Бельгия, Ирландия, Азербайджан, Кипр, Норвегия, Хорватия, Украина, Эстония, Сан-Марино, Чехия, Греция, Австрия, Грузия, Молдавия, Португалия, Сербия, Финляндия, Албания, Швейцария, Латвия, Болгария уонна Дания артыыстара кытталлар.
Арассыыйаттан Russian Woman («Русская женщина») диэн ырыанан Манижа бэк-вокалистарын кытта кыттар. Кини айар бөлөҕөр Саха сириттэн төрүттээх Июлина Попова киирдэ.
«Евровидение» финала ыам ыйын 22 күнүгэр буолуоҕа.
Хаартыска — РИА.