Социальнай ситимнэргэ Саха сирин аптекаларыгар тымныйыыны уонна коронавирус дьаҥын эмтиир эмп бүппүтүн уонна сорох улуустар аптекаларыгар эмп сыаната олус ыараабытын туһунан сурах тарҕанар.
Росздравнадзор чахчытынан, сыана эмп капсулатын ахсаанынан уонна дозировкатынан (капсулаҕа 50-тан 200 мг тиийэ киирэр) быһыллар. Холобур, «Арбидол №10» курдук эмп «Арбидол №20»-тэн сыаната атын. «Арбидол №20» ахсаанынан капсулата элбээбитинэн сыаната үрдүүр. Онон эми атыылаһаргытыгар быһаарыытын болҕомтолоохтук үөрэтиҥ.
Улуустартан холобурдаатаххха, Сунтаардааҕы 28-с №-дээх киин аптекаҕа «Арбидол» суох диэн батсаапка тарҕаммыта. Аптека үлэһиттэрэ бэлиэтииллэринэн, эми тутуһууга тиэрдээччи (поставщик) маркировкатыгар тиэхиньиичэскэй сыыһаны оҥорбутунан бэрэбиэркэ ыытыллан, эмп атыыта тохтотулла сылдьыбыт.
Кэлиҥҥи кэмҥэ маннык кыһалҕа Арассыыйаҕа барытыгар чаастатык көстөр буолла. Ол эрээри алтынньы 10 күнүттэн балаһыанньа көннө. Онон Сунтаардааҕы 28-с №-дээх киин аптекаҕа бу күннэргэ сөптөөх эмп баар.
Росздравнадзор бэлиэтээбитинэн, «Арбидол» диэн эми «Афлюдол», «Арпефлю», «Арбидол максимум», «Умифеновир» диэн эмтэр солбуйаллар.
Аптека сыаналарын уонна эмп тиийбэтин туһунан Роспотренадзорга 8 (4112) 42-56-28 (09.00- 18.00 ч. диэри) эрийиэххэ сөп. Эбиэт — 13.00- 14.00 ч. Эбэтэр +7 914 270-16-05 (суукканы эргиччи эрийиэххэ, иһитиннэриини эмиэ хаалларыахха сөп).
СӨ Ил Дарханын уонна бырабыыталастыбатын пресс-сулууспата.
Елена ПОТОЦКАЯ бэлэмнээтэ.
«Саха сирэ» хаһыат, edersaas.ru
Хаартыска — rg.ru саайтан.