«Ростелеком» хампаанньа саҥа бырайыагы билиһиннэрдэ...
Олох-дьаһах

«Ростелеком» хампаанньа саҥа бырайыагы билиһиннэрдэ

Атырдьах ыйын 6 күнүгэр «Ростелеком» хампаанньа саҥа бырайыагын билиһиннэрбитэ. Тэрээһин youtube.com саайтка видео-кэмпириэнсийэ киэбинэн ыытылынна.

Ол курдук, бүгүн хампаанньа исписэлиистэрэ «Ростелеком Ключ» диэн ааттааах элбэх кыбартыыралаах дьиэҕэ туһаныллар бырайыак саҕаламмытын туһунан сиһилии кэпсээтилэр. Бу бырайыак иһигэр «Умный домофон», «Умный шлагбаум», «Комплексное видеонаблюдение» уонна «Телеметрия» («өйдөөх» счетчик) өҥөлөрө бааллар.

«Ростелеком» Саха сиринээҕи «Сахателеком» салаатын дириэктэрэ Константин Войтеховскай: «Ростелеком Ключ»  хампаанньабыт биир саҥа бырайыагынан буолар. Олох-дьаһах уонна коммунальнай хаһаайыстыба өҥөлөрүн хонтуруоллуур «Өйдөөх дьиэ» бырайыактан саҥа таһымҥа таҕыстыбыт. Сотору кэминэн «Ростелеком Ключ» Дьокуускай уонна да атын куораттар хас биирдии кыбартыыраларыгар баар өҥө буолуоҕа диэн эрэнэбин», — диэн санаатын эттэ.

Тэрээһиҥҥэ «Сахателеком» килийиэннэри кытта үлэлиир бырайыактарын менеджерэ Баин Азаргаев саҥа бырайыак сонун өрүттэрин кэпсээтэ. «Умный домофон», «Умный шлагбаум», «Комплексное видеонаблюдение» уонна «Телеметрия» өҥөлөрү төлөпүөммүтүгэр анал сыһыарыыны хачайдаан туһанабыт.

«Умный домофон» өҥө көмөтүнэн дьиэҕэ холбонон турар домофон туруупкатынан туһаммакка, төлөпүөммүт нөҥүө дьиэбитигэр ким кэлбитин көрүөхпүтүн, ааммытын арыйыахпытын, ыалдьыттарбытыгар быстах кэмҥэ туһаныллар код биэриэхпитин, видео устуохпутун сөп эбит.

Оттон дьиэни тутааччыларга уонна салайар хампаанньаларга бу өҥө эмиэ олус туһалаах буолсу. Ол курдук, бырайыак тиэхиньиическэй көрүүтэ-истиитэ барыта «Ростелекомҥа» көһөр. Аны IP-домофон буолан, дьиэ подъеһыгар эбии  боробуоттары холбооһун эҥин наадата суох.

Холобурдаан суруйдахха, Дьокуускайга бырайыак номнуо үлэлии турар. Ол курдук, Шевченко аатынан уулусса 5-с №-дээх дьиэтэ тутулла турдаҕына «Умный домофон» өҥөнү холбообуттар.

«Комплексное видеонаблюдение». Бу өҥөнү туһанан дьиэбит таһыгар ким кэлбитин-барбытын хантан баҕарар төлөпүөммүт нөҥүө көрүөхпүтүн сөп. Оччотугар подъезка туора дьон киирбэтин, парковкаҕа массыына этэҥҥэ турарын хонтуруоллуохпутун сөп буолар.

Маны сэргэ элбэх кыбартыыралаах дьиэлэри салайар хампаанньалар видеонан кэтээн көрүү сервиһин туһанан туох эмит буолар түгэнигэр стоп-каадырдары оҥоруохтарын, олохтоохтор көрдөһүүлэринэн архыыптан видеолары хостуохтарын сөп.

«Умный шлагбаум» — дьиэ таһынааҕы сири-уоту көрөргө-истэргэ, киириини-тахсыыны хонтуруоллуурга олус туһалаах өҥө. Массыынанан дьиэ таһыгар кэллэххэ шлагбауму арыйаары күлүүс көрдөөбөккө, аныгылыы «RFID-метка» туруоттарабыт. Бу тэрили массыына тааһыгар иһиттэн сыһыараллар, оччоҕуна 1-4 миэтэрэ чугаһаатахха  шлагбаум бэйэтэ арыллар. «RFID-метката» суох массыыналар дьиэ таһынааҕы сиргэ-уокка киирбэттэр, дьиэ олохтоохторо парковкаҕа миэстэ көрдөөн эрэйдэммэттэр. Маны таһынан, шлагбауму төлөпүөн сыһыарыытын нөҥүө эмиэ арыйыахха сөп.

«Телеметрия». Бу өҥө уу, уот, ититии счетчиктарын көрдөрүүлэрин хомуйан дьиэни салайар хампаанньаҕа тиэрдэр. Маныаха төлөпүөҥҥэ хаһан баҕарар хас биирдии счетчик статистикатын көрүөхпүтүн, хонтуруоллуохпутун сөп, туох баар ифнормация барыта көстө турар. «Телеметрия» ханнык өҥөҕө хас харчы барарын чуолкайдык көрдөрөр.

Өҥө элбэх кыбартыыралаах дьиэҕэ биир эмит дьиэҕэ кэһилии тахсыбытын тута салайар хампаанньаҕа көрдөрөр, оччотугар дьиэҕэ араас саахал тахсыытын түргэнник туоратыахха сөп.


«Ростелеком Ключ» бырайыагы элбэх кыбартыыралаах дьиэҕэ холботторорор туһуттан дьиэ олохтоохторо бары сөбүлэһиэхтэрин уонна хампаанньаны кытта дуогабар түһэрсиэхтэрин наада.

Сонун бырайыагы туһанан, олохпутун чэпчэтиэххэйиҥ, саҥа технологиялары кытта тэҥҥэ хардыылыахха диэн ыҥырабыт! 

Айтана Аммосова, edersaas.ru

Сүрүн хаартыска — info.sibnet.ru саайтан.

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

шестнадцать + 13 =