Ил Дархан Айсен Николаев бүгүн «Ростелеком» Уһук Илиннээҕи макроэрэгийиэнин вице-бэрэсидьиэнэ Александр Логиновы кытары көрүстэ. Көрсүһүүгэ олоххо киирбит бырайыактар уонна инники үлэ туһунан кэпсэттилэр.
Көрсүһүүгэ СӨ вице-премьерэ Сергей Местников, инновация, цифровой сайдыы уонна инфокоммуникационнай технология миниистирэ Анатолий Семенов уонна «Ростелеком» бэрэстэбиитэллэрэ Максим Ситников, Константин Войтеховскай кытыннылар.
Айсен Николаев «Ростелеком» хампаанньаҕа таһаарыылаах үлэтин иһин махтанна. «Сарсын өрөспүүбүлүкэҕэ бэлиэ түгэн буолаары турар. Өлөөн улууһугар оптоволокно холбонуохтаах. Салгыы Өлөөнтөн оптоволокно Өлөөн Дьилиндэтигэр, Анаабыр Сааскылааҕар диэри тардыллыаҕа. Онон Саха сирэ «Ростелекомом» хампаанньаны кытта оптиканы тардыы курдук дьоһун суолталаах боппуруостары быһаараллар», — диэн Ил Дархан эттэ.
Александр Логинов Айсен Николаев араас бырайыактар олоххо киирэллэригэр куруук өйүүрүн иһин махталын тириэртэ. Маны таһынан 2020 сылга балтараа тыһыынча килэмиэтир оптоволокно ситимэ тардыллыбытын эбэн эттэ.
Инники былааннар туһунан тохтоотоххо, быйыл Хаҥалас улууһун саамай кытыы нэһилиэгэр — Иһиккэ оптоволокно тардыллан, салгыы мантан Өлүөхүмэҕэ барыахтаах. Маны таһынан Саха сирин арҕаа оройуоннара бары биир ситимҥэ холбоһуохтаахтар.
СӨ Ил Дарханын уонна Бырабыыталыстыбатын пресс-сулууспата