Уопсастыба

Росстандарт cаҥа бырайыак саҕалаата

Ыам ыйын 15 күнүттэн Росстандарт аһылык бородуукталарын ГОСТ ирдэбиллэринэн бэрэбиэркэлиир саҥа пилотнай бырайыагы саҕалаата. ГОСТ быһыытынан, аһы-үөлү оҥорон таһаарааччы бородууксуйата Россияҕа оҥоһуллубут ирдэбиллэргэ сөп түбэһиэхтээх. edersaas.ru

Онон, Росстандарт табаары оҥорон таһаарааччылартан «ГОСТ ирдэбиллэригэр сөп түбэһиини бигэргэтии” судаарыстыбаннай бырайыакка кыттарга сайаапканы хомуйууну саҕалаата. Бэрэбиэркэ түмүгүнэн тургутууну ааспыт эрэ хаһаайыстыба, хампаанньа бэйэтин бородууксуйатын стандарт национальнай ситимин (ННС) бэлиэтинэн мааркалыыр бырааптаныаҕа. Ону таһынан, Росстандарт сайтыгар анал реестргэ киллэриллиэҕэ.

Табаары оҥорооччу бородууксуйатын көҥүлэ суох ГОСТ-ынан бэлиэтээбит түбэлтэтигэр интеллектуальнай бас билии көмүскэлин туһунан сокуону кэһии иһин административнай эппиэккэ тардыллыа итиэннэ ыстарааптаныа. Пилотнай бырайыак бу сылга сэттэ эрэгийиэҥҥэ: Нижегород, Киров, Оренбург, Волгоград, Омскай, Свердловскай уобаластарга уонна Крымҥа үлэлиэҕэ. 2018 сылтан бүтүн Россия үрдүнэн, ол иһигэр Саха Өрөспүүбүлүкэтигэр киириэҕэ.

Раиса Сибирякова, “Саха сирэ” хаһыат, edersaas.ru

2
0
Telegram @edersaas20

Добавить комментарий