Бүгүн биһиги өрөспүүбүлүкэбит киин куоратыгар “Россия хоккейга сулустара” диэн Бүтүн Россиятааҕы хамсааһын чэрчитинэн албан аатырбыт хоккеистар кэллилэр. Кинилэри Россия хоккейга федерациятын толорооччу дириэктэрэ Алексей Киреев салайан илдьэ кэллэ. Бөлөх састаабыгар Олимпиада икки, аан дойду алта төгүллээх чөмпүйүөнэ, спорт үтүөлээх маастара, номоххо киирбит Борис Майоров, Россия сүүмэрдэммит хамаандатын вице-хапытаана, Наганотааҕы-98 Олимпиада үрүҥ көмүс призера, аан дойду икки төгүллээх чөмпүйүөнэ, спорт үтүөлээх маастара Алексей Морозов уонна “Нуучча танката” диэн аатынан биллэр олимпийскай чөмпүйүөн, спорт үтүөлээх маастара Андрей Коваленко бааллар.
Кинилэр биир күннээх сырыыларын Саха сирин күндү таастарын мусуойун көрүүнэн саҕалаатылар. Эбиэттэн киэһэ “Эллэй Боотур” Муус дыбарыаһыгар өрөспүүбүлүкэ хоккейга федерациятын президенэ, Ил Түмэн депутата Олег Тарасовы кытта көрүстүлэр, эдэр спортсменнарга маастар-кылаас көрдөрдүлэр, пресс-конференцияҕа кытыннылар. Түмүккэ бииргэ хаартыскаҕа түһүү уонна өйдөбүнньүк илии баттааһын тэрилиннэ.
Аатырбыт хоккеистар бу сырыыларын сыала-соруга тугуй диэтэххэ, сүрүн соругунан регионнарга көмөлөһүү, оҕо спордун сайыннарыы буолар. Маннык, биллиилээх маастардар аһаҕас уруоктарын ыытыынан, албан аатырбыт хоккеистары кытта көрсүһүүнэн эрэ биһиги оҕолорбутун спордунан дьарыктаныыга угуйуохпут. Ити, Россия хоккейга федерациятын сүрүн спонсора АЛРОСА, спорт бу көрүҥүн сайыннарыыга ыытар үлэтин сорҕото. Көрсүһүү түмүгүнэн Россия уонна Саха сиринээҕи хоккей федерацияларын үлэлэрин ситимнээһиҥҥэ, судьуйаларга уонна тренердэргэ анал семинардары тэрийиигэ, оҕолор турнирдарын ыытыыга, инвестордары кыттыһыннарыыга, хоккей инфракструктуратын сайыннарыыга сөбүлэһиилэр оҥоһулуннулар.
ПЕТР ПАВЛОВ суруйуута уонна хаартыскаҕа түһэриилэрэ.
edersaas.ru