Бэҕэһээ, бүгүн «Россия 24» телеханаалга «Деловое путешествие» бырайыак иитинэн, «Век Якутии» диэн телесуруналыыс Алексей Михалев документальнай киинэтэ көһүннэ.
Телеханаал «Деловое путешествие» бырайыага номнуо бэһис сылын үлэлиир. Суруналыыстар Арассыыйа араас эрэгийиэннэринэн сылдьан, анал репортажтары оҥороллор. Саха сиригэр кэлиэхтэрин иннинэ, Томскай, Новгородскай уобаластарга, Кабардино-Балкарияҕа уонна да атын эрэгийиэннэргэ, куораттарга сылдьан, олус интэриэһинэй биэриилэри оҥорон көрдөрбүттэрэ.
Саха сиригэр киинэни устар бөлөх бу сыл кулун тутарыгар кэлэн үлэлээбитэ. Киинэҕэ Саха сирэ эрэгийиэн быһыытынан уратыта, ситиһиилэрэ, үгэстэрэ көһүннэ. Киинэ бастакы каадырдара муҥхалааһынтан саҕаланар.
Документальнай киинэҕэ Саха сирин тымныыта, номнуо Арассыыйаҕа бренд быһыытынан биллибит «Саха киинэтэ», алмааһы хостооһун, сылгыны иитии, ай-ти салаа, саҥа тутуулар туһунан кэпсэнэллэр. Суруналыыс Хаҥалас улууһугар Наука аччыгый академиятын саҥа аһыллыбыт үөрэтэр-лабораторнай куорпуһугар ыалдьыттаабыт. Ол курдук бу ый саҥата саҥа куорпус уонна 100 миэстэлээх интэринээт үлэҕэ киирэр үөрүүлээх тэрээһинэ буолбута. Саха Өрөспүүбүлүкэтэ төһө кыалларынан үөрэхтээһини сайыннарыыга сөптөөх үлэни ыытар, ол туоһутунан бу саҥа тутуу буолар.
Саха сиригэр үлэлиир «Сайберия» хампаанньа үлэһиттэрэ диагностическай тэрилгэ анаан мэдиссиинискэй бырагырааманы толкуйдуохтаахтар. Бу туһунан суруналыыс биэриитигэр эмиэ ахтан ааста. Тастан кэлэр табаары солбуйуу туһунан түһүмэххэ, «Саюри» тэпилииссэ үлэтэ көһүннэ. Билиҥҥтэ тэпилииссэ Дьокуускай куораты уонна чугастааҕы улуустары сибиэһэй оҕуруот аһынан сылы эргиччи хааччыйан олорор.
Документальнай киинэ 26 мүнүүтэлээх.
«Век Якутии» биэриини салгыы манна көрүҥ: https://smotrim.ru/video/2403829
edersaas.ru