Россельхозбаан Саха сиринээҕи салаата өрөспүүбүлүкэҕэ тыа сирин ипотекатыгар икки бастакы кирэдьиити биэрдэ. Ол туһунан баан пресс-сулууспата иһитиннэрэр. Килийиэннэр чэпчэтиллибит ипотеканан Нам улууһугар кыбартыыра уонна чааһынай дьиэ атыыласпыттар.
edersaas.ru
Тыа сирин биир кэлим сайыннарыы бырагыраама чэрчитинэн, дьиэ атыылаһарга Тыа хаһаайыстыбатын министиэристибэтэ 3% ипотеканы олохтообута. Сойуомсук страховкаланнаҕына, Россельхозбаан 2,7% кирэдьиит биэрэр. Баан ыстаапкатын уонна чэпчэтиллибит ыстаапка араастаһыытын судаарыстыба субсидиялыыр.
Маннык бырагыраама Арассыыйа үрдүнэн Москва уонна Санкт Петербург куораттан ураты барыларыгар үлэлиир. Россельхозбаан Саха сиринээҕи салаатын дириэктэрэ Василий Тимофеев: «Россельхозбаан Арассыыйа Тыатын хаһаайыстыбатын министиэристибэтин кытта сөбүлэһии түһэрсэн, тыа сиригэр чэпчэтиллибит ипотеканы биэрэргэ бастакы баан буолла», — диэн бэлиэтээтэ.
Ону таһынан, өрөспүүбүлүкэ бүддьүөтүн суотугар Саха сиригэр тыа сирин ипотекатын бырыһыанын өссө намтатан баара-суоҕа 2%, оттон страховкаламмыт дьоҥҥо 1,7% биэриэхтэрэ. Оттон эрдэ 2,7% тыа сиригэр ипотека ылбыт дьон СӨ Тыа хаһаайыстыбатын миниистирэ Александр Атласов этэринэн, эбии сөбүлэһии түһэрсибиттэрин кэннэ бырыһыан ыстаапката кыччаан биэриэҕэ.
«Саха сирэ», edersaas.ru
Хаартыска agro.cap.ru