Россельхозбаан — «тобук», Сбербаан — аана аһаҕас

Бөлөххө киир:

Тыа хаһаайыстыбатын табаарын оҥорооччуларга бэриллиэхтээх чэпчэтиилээх кирэдьиит дьылҕата ыараабытын туһунан суруйан турабыт. Этэргэ дылы, бааһынайдар үс-түөрт ыйы быһа кэтэһэн-кэтэһэн кэлтэгэй буоллулар. Сыарҕа сыҥааҕа хаһан хоҥнуой? edersaas.ru


СӨ тыатын хаһаайыстыбатын уонна ас-үөл бэлиитикэтигэр министиэристибэтин үбүн департаменын сүрүн исписэлииһэ Наталья Степанова иһитиннэрэринэн, бу күҥҥэ диэри биир даҕаны хаһаайыстыба хайа да баантан соххор солкуобайы ыла илик. Ол эрээри, икки сүрүн баантан бииригэр эрэл кыыма кыламныырын этэр. Сбербааҥҥа 5 бырыһыаннаах кирэдьииккэ 9 клиент ыкса үлэлэһэ сылдьарыттан биир хаһаайыстыба докумуона баан сиидэтин ааһан, РФ тыатын хаһаайыстыбатын министиэристибэтэ реестргэ киллэрэрэ эрэ хаалбыт. Иккис хаһаайыстыбаҕа баан бүгүн быһаарыы таһаарыахтаах. Онон ити хаһаайыстыбалар кэлэр нэдиэлэ ортотугар, бүтүүтүгэр харчы өҥүн көрүөхтэрин сөп.

Манна даҕатан, Наталья Николаевна бэлиэтииринэн, биһиги хаһаайыстыбаларбыт докумуону хомуйалларыгар бэйэлэрэ олус бытаараллар эбэтэр аараттан тохтоон хаалаллар. Үгүстэр саллаллар. Дьиҥэр, Сбербаан хаһаайыстыбалары кытта үлэлэһэргэ бэлэм, бэл диэтэр, хотуттан ыҥыра олорор. Онон, этэргэ дылы, ааннара кимиэхэ баҕарар аһаҕас эбит.

Тыа сирин олохтоохторо чэпчэтиилээх кирэдьииккэ тиксэллэригэр биир сүрүн харгыс баарын исписэлиис ыйар: ол – дьон хайа бааҥҥа кимиэхэ тиийэн быһаарсалларын билбэттэрэ, быһата, иһитиннэрии-биллэрии ситэтэ суоҕа атахтыыр. Ол иһин хаһаайыстыбалар салайааччыларыттан саҕалаан улуустар баһылыктарыгар тиийэ хайа улууска ханнык баан баарын, суох буоллаҕына чугаһынан ханна, кимиэхэ сылдьыахха сөбүн аадырыстарын, төлөпүөннэрин ыйан туран сурук ыыталаабыттар.

Оттон тыа хаһаайыстыбатын үлэһиттэрин уһун соннуохтаах тэрилтэ – «Россельхозбаан» ААУо дьыалата хайдаҕый? Норуот тылынан судургутук эттэххэ, «тобук» буолбут. Саха сирин баар-суох, киэн туттар хаһаайыстыбаларын кытта төттөрү тибилийэ олорор. Ил Дархан Егор Борисов соторутааҕыта быһа эфиргэ ыйытыыларга хоруйдууругар «тыа хаһаайыстыбатын сүрүн баана салалта эрэлин толорботоҕун» туһунан хаарыйан эппитэ. Эдэр саҥа салайааччы Василий Тимофеев: «Кыраны бэйэбит быһаарар кыахтаахпыт», – диэбитэ гынан баран, Москва кытыы сиргэ олорор кыра дьон кыһалҕатыгар улаханнык долгуйбат буолбут быһыылаах ээ…

Быйыл сайын бэс ыйын бүтүүтүгэр дойду тыатын хаһаайыстыбатын миниистирэ Александр Ткачев Дьокуускайга кэлэн, Уһук Илиҥҥи уонна Сибиирдээҕи федеральнай уокуруктар регионнарыгар анаан ыытыллар «Дьоҕус киэптээх хаһаайыстыбаларга судаарыстыба өйөбүлэ уонна тыа сирин бигэтик сайыннарыы» диэн Бүтүн Россиятааҕы семинар-сүбэ мунньахха кыттыаҕа. Онно чэпчэтиилээх кирэдьиит «тараҕай» боппуруостарыгар чопчу быһаарыы ылыллара сабаҕаланар.

Түмүктээн эттэххэ, кылгас болдьохтоох кирэдьииттээһиҥҥэ РФ 2017 сылга көрбүт лимиитин өрөспүүбүлүкэбит бу хаалбыт кылгас кэмҥэ бөдөҥ бырайыактарынан кииристэҕинэ эрэ толору туһанар кыахтаах. Дьокуускайдааҕы көтөр фабриката көтөр аһылыгын атыылаһарга анаан 130 мөл. солк. суумаҕа бырайыактаах. Дьокуускай куораты уонна чугастааҕы улуустары куурусса сымыытынан хааччыйан олорор тэрилтэҕэ ВТБ баан, табылыннаҕына, сотору кэминэн «мүччү ыһыктыа».

Василий НИКИФОРОВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0