«Россельхозбаан» Саха сиринээҕи салаатын эбии офистара сарсыарда 9 чаас 30 мүнүүтэттэн үлэлиир буолуохтара. Онон, баан килийиэннэрэ ханна да ыксаабакка, улуустарга уонна куораттарга баар офистар өҥөлөрүнэн туһанар кыахтаннылар.
Анивера Акимова, «Саха сирэ» хаһыат, https://edersaas.ru/
Нэһилиэнньэни кытары үлэ хаачыстыбатын үрдэтэр сыалтан, баан үлэлиир болдьоҕун уһатан биэрдэ. Онон бүгүҥҥүттэн саҕалаан, филиал офистара бэнидиэнньиктэн бээтинсэҕэ диэри килийиэннэри кытары сарсыарда 09-30 мүнүүтэттэн киэһэ 17-30 чааска диэри үлэлиэхтэрэ. Эбиэт кэмигэр биир чаастан иккигэ диэри тохтобул.
Бүгүҥҥү туругунан, «Россельхозбаан» өрөспүүбүлүкэ үрдүнэн 14 эбии офистаах уонна 74 банкоматы уонна 18 терминалы үлэлэтэр. Банкомат уонна терминал көмөтүнэн мобильнай сибээс, интэриниэт, кабельнай, спутниковай телевидение, коммунальнай өҥө, кирэдьиит харчытын төлүөххэ сөп.
Саха сиринээҕи салаа дириэктэрэ Василий Тимофеев: «Өрөспүүбүлүкэ улуустарын олохтоохторо «Россельхозбаан» өҥөтүнэн туһаналларыгар бары күүспүтүн уурабыт. Онон офистарбыт, банкомат, терминал үлэлэригэр улахан болҕомтобутун уурабыт. Маны таһынан, «Зарплатный5+» пластиковай хаарталаах дьон ханнык баҕарар баан банкоматтарыттан харчы усталларыгар хамыыһыйа, ол аата эбии төлөбүр ылыллыбатын туһунан этиэм этэ», – диэн иһитиннэрдэ.
Анивера Акимова, «Саха сирэ» хаһыат, https://edersaas.ru/