Сүрүн Уопсастыба Эдэр саас

Банкир Василий Тимофеев «СЫТС-2017» күрэхтэһиини көрдө



«Россельхозбаан» Саха сиринээҕи салаатын дириэктэрэ, Ил Түмэн дьокутаата Василий Тимофеев Хаҥаласка буолбут «СЫТС-2017» тэрээһиҥҥэ тус бэйэтинэн тиийэн кэллэ.

Айталина СОФРОНОВА,  https://edersaas.ru

СЫТС онус сылын кыттар Нонна Ноговицынаҕа 20 тыһ. солк сыаналаах үрүҥ көмүс манньыаты туттарда.

Кини ходуһаҕа киирэн күрэхтэһии хаамыытын көрдө, кыраабыл тутан бугул түгэҕин харбаата.  «СЫТС» ыччат күрэхтэһиитин туһунан санаатын маннык үллэһиннэ:
— Маннык бырайыак үлэлээбитэ олус наһаа наадаалаах дии санаатым. Саха ыччата сүрүн эйгэбит — тыа хаһаайыстыбата буоларын умнуо суохтаахпыт. Ыччат сылынан сибээстээн, быйыл араас тэрээһиннэр бөҕө буоллулар олортон биирдэстэрэ бу бырайыак буолар. Биир бэйэм тыа сиригэр улааппыт, киһи буоларын быһыытынан от оттоон, тыа үлэтин-хамнаһын билэбин. Бу үс күн устата кыттааччылар бэйэлэригэр сэниэ, күүс эбинэн инникигэ эрэллээхтик хардыылыыллар. Аныгыс буолар күрэхтэһии өссө элбэх кыттааччылаах буоларыгар эрэнэбин. Биһиги бааммыт, тэрийээччилэртэн этии киирдэҕинэ, көмөлөһүөн сөп.

ЫСПЫРААПКА: «СЫТС-2017»

«Эдэр саас» хаһыат тохсус төгүлүн тэрийэр «Саха ыччатын – тыа сиригэр: СЫТС» күрэхтэһиитэ быйыл Хаҥалас улууһун Нөмүгү нэһилиэгэр буолла. Күрэхтэһии бирииһин пуондатын олоччу — олохтоох дьону үлэ миэстэтинэн хааччыйарын биллибит «Анаабыр Алмаастара» хампаанньа олохтоото. Атырдьах ыйын 4-6 күннэригэр, үс күн устата, улуустар, нэһилиэктэр, түмсүүлэр хамаандалара оту охсууга, мунньууга, кэбиһиигэ, уонна солуур оргутуутугар күрэхтэстилэр. Бу уруккута “От-шоу” – билигин кэҥээн “СЫТС” диэн ааттанар. Былырыыҥҥы «СЫТС» Амма улууһун Абаҕа нэһилиэгэр буолбута.

Айталина СОФРОНОВА,  https://edersaas.ru

Кэбиһиилээх от.

ВИП-ыалдьыттар

Банкир Василий Тимофеевы таһынан, Нөмүгү Чороон Ыйаабыт ходуһатыгар бу өрөбүллэргэ буолбут күрэхтэһиигэ, атын да үрдүк сололоох салайааччылар кытыннылар. СӨ Инвстицияҕа, урбааҥҥа уонна туризмҥа миниистирэ Антон Сафроновы, ыччат дьыалаларыгар уонна дьиэ кэргэн бэлиитикэтигэр миниистири бастакы солбуйааччы Василина Лукинаны, тыа хаһаайыстыбатын уонна ас-үөл бэлиитикэтин миниистирин солбуйааччы Семен Потаповы, «Анаабыр Алмаастара» генеральнай дириэктэрин сүбэһитэ Петр Чехордуну, Нөмүгү нэһилиэгин баһылыга Максим Васильевы ходуһа устун хаама сылдьалларын көрүөххэ сөп этэ.

 

4
0

Санааҕын суруй