Росприроднадзор управлениетын саҥа салайааччытын билиһиннэрдилэр

Айылҕаны туһаныы эйгэтигэр судаарыстыбаннай сулууспа уонна федеральнай сулууспа каадырдарыгар управление начаалынньыга Тимур Ахунянов олунньу 17 күнүгэр СӨ Ил Дархана Айсен Николаевка Саха сиригэр Росприроднадзор управлениетын саҥа салайааччытын Андрей Жолудевы билиһиннэрдэ (урут биэдэмистэ салайааччытын солбуйааччы).

edеrsaas.ru

«Андрей Викторович эрэгийиэн кыһалҕалаах боппуруостарын үчүгэйдик билэр. Кини өрөспүүбүлүкэ сиригэр-уотугар бэйэтин эбээһинэһин үтүө суобастаахтык толоруо диэн эрэнэбин», -– диэтэ Тимур Ахунянов.
Айсен Николаев Росприроднадзор управлениетын дьоһун суолталаах соруктарыттан биирдэстэринэн биэдэмистибэ өрөспүүбүлүкэ Экологияҕа, айылҕа харыстабылыгар уонна ойуур хаһаайыстыбатыгар министиэристибэтин, ону таһынан туһааннаах структуралары кытта хардарыта бииргэ үлэлээһини күүһүрдүөхтээҕин туһунан эттэ.
«Өрөспүүбүлүкэ сиригэр-уотугар үксүгэр кэриэтэ Росприроднадзор хонтуруолугар киирэр эбийиэктэр бааллар. Биһиги көхтөөхтүк бииргэ үлэлэһиэхтээхпит, ол иһигэр, биэдэмистибэ эрэгийиэн министиэристибэтин кытта хардарыта бииргэ үлэлээһинин үрдүк таһымҥа таһаарыахтаахпыт. Өрөспүүбүлүкэ ити соруктары толорууну өйүүргэ уонна көмөлөһөргө бэлэм», -– диэн Айсен Николаев тоһоҕолоон бэлиэтээтэ.
Оттон Андрей Жолудев өрөспүүбүлүкэ салалтатын уонна федеральнай биэдэмистибэ итэҕэлин толорорго туох кыалларын барытын оҥорорго эрэннэрдэ.

Надежда ЕГОРОВА, «Саха сирэ», edеrsaas.ru
Андрей СОРОКИН (СИА) хаартыскалара