Саха сиригэр муус устар 12 күнүттэн 18 күнүгэр диэри 8621 киһи тымныйан (ОРВИ) ыалдьыбыта бэлиэтэммит.
edersaas.ru
Лабораторияҕа кэтээн көрүү көрдөрөрүнэн өрөспүүбүлүкэ иһигэр кириипкэ майгынныыр вирустар тарҕаммыттар – парагрипп, аденовирус, RC-вирус, риновирус, бокавирус, метапневмовирус. Ордук тарҕаммыт вируһунан парагрипп буолбут. ОРВИ-нан ыалдьыбыт дьон уопсай ахсааныттан 69% оҕо-аймах. Ордук элбэх дьаҥнааччынан 15 саастарын ааспыт оҕолор буолбуттар. Бу туһунан Роспотребнадзор Саха сиринээҕи салаата иһитиннэрэр.
СӨ Роспотребнадзор управлениетын салалтата кириип уонна ОРВИ тарҕаныыларын бохсор ньымалар тустарынан санатар.
-
Тыынар уорганнары харыстанар тэриллэри (маасканы, респираторы) сабыылаах сирдэргэ (баан, атыы дьиэтэ, автобус, такси уо.д.а) куруутун кэтэргитин умнумаҥ.
-
1,5-2 миэтэрэлээх социальнай ыраах буолууну тутуһуҥ, улахан кыһалҕата суох буоллаххытына, элбэх киһи тоҕуоруһар сирдэригэр сылдьымаҥ.
-
Ыраастык туттуҥ, антисептиктары туһаныҥ, бэрчээккэни кэтиҥ, смартфоҥҥутун антисептигынан ыраастааҥ.
-
олорор дьиэҕитин салгылатыҥ, инчэҕэй тирээпкэнэн сотуҥ.
-
дьон сылдьар сириттэн кэлэн баран муруҥҥутун ыраастааҥ.
-
таһырдьа тоҥмот гына сөптөөхтүк таҥна сылдьыҥ.
-
иммунитеты бөҕөргөтөр эмтэри быраас сүбэтинэн иһиҥ.
-
ыалдьыбыт дьону кытта алтыстаххытына, дьиэ кэргэҥҥитэгэр ыалдьыбыт киһи баар буоллаҕына, вируһу профилактикалыыр эмтэри быраас сүбэтинэн туһаныҥ.
-
С битэмиининэн баай аһы аһыы сатааҥ (отон араас көрүҥүн, фрукталары).
-
чөл олоҕу тутуһуҥ, сөптөөхтүк утуйуҥ, успуордунан дьарыктаныҥ.
ОРВИ сибикилэрэ билиннэхтэринэ, бэйэҕит эмтэнэ сатаамаҥ. Суһаллык быраас ыҥыран көрдөрүҥ.
«Саха сирэ» хаһыат, edersaas.ru
Хаартыска Хабар24